வாக்கிங் போனபோது துணை நடிகருக்கு மாரடைப்பு... மரணம்

பல்வேறு படங்கள் மற்றும் டிவி தொடர்களில் நடித்துள்ள மனோகரன் என்பவர் வாக்கிங் போனபோது திடீரென மாரடைப்பு ஏற்பட்டு மயங்கி விழுந்து மரணமடைந்தார்.

சகுனி உள்ளிட்ட படங்களில் போலீஸ்காரராக நடித்துள்ளார் மனோகரன். டிவி தொடர்களிலும் நடித்து வந்தார். இவருக்கு வயது 62. இவர் நேற்று காலை வாக்கிங் போனார். நந்தனம் பகுதியில் உள்ள ஒய்எம்சிஏ மைதானத்தில் வாக்கிங் போய்க் கொண்டிருந்தபோது திடீரென அவருக்கு நெஞ்சு வலித்துள்ளது. சம்பவ இடத்திலேயே அவர் மயங்கி விழுந்தார். இதைப் பார்த்தவர்கள் உடனடியாக 108 ஆம்புலன்ஸுக்குப் போன் செய்தனர். அவர்கள் வந்து ராயப்பேட்டை அரசு மருத்துவமனைக்குக் கொண்டு சென்றனர்.

அங்கு அவரைப் பரிசோதித்த டாக்டர்கள் ஏற்கனவே மனோகரன் இறந்து விட்டதாக தெரிவித்தனர். மறைந்த மனோகரனுக்கு மனைவி, 2 மகன்கள் உள்ளனர்.

மனோகரன் உடலுக்கு திரையுலகினர் அஞ்சலி செலுத்தினர். மனோகரனின் சொந்த ஊர் ராமநாதபுரம் ஆகும்.