லிங்கா பார்க்கப் போறேன்... அலுவலகங்களில் குவியும் லீவ் லெட்டர்கள்!

சார்.. டிசம்பர் 12-ம் தேதி லீவ் வேணும்...

காரணம்?

அன்னிக்கு தலைவர் சூப்பர் ஸ்டார் பிறந்த நாள்.. லிங்கா ரிலீஸ்.. ரெண்டையும் கொண்டாடணும்!

-மேலே நீங்கள் படித்தது கற்பனையான ஒன்றல்ல... கடந்த ஒரு வாரமாக உலகமெங்கும் உள்ள பல்வேறு ரஜினி ரசிகர்கள் தங்கள் அலுவலகங்களில் விண்ணப்பித்த விடுமுறைக் கடிதம். அவை பேஸ்புக்கிலும் வாட்சப்பிலும் வெளியாகி கலக்கி வருகின்றன.

ஒரு பக்கம் மிகுந்த ஆச்சர்யம் தந்தன இக்கடிதங்கள். ஒரு காலத்தில் சினிமா பார்க்கப் போறேன் என்று கேட்டு விடுமுறைக் கேட்டால் எத்தனை கேவலமாகப் பார்ப்பார்கள் என்பதை நினைத்துப் பாருங்கள்.

ஆனால் ரஜினி அந்த நிலையை அடியோடு மாற்றியிருக்கிறார். ரஜினி படத்தைப் பார்க்கணும்.. அவர் பிறந்த நாள் கொண்டாடணும்... லீவ் கொடுங்க என்று அதிகாரப்பூர்வமாக, அதுவும் எழுத்து வடிவில் கேட்கும் நிலையை ஏற்படுத்தியிருக்கிறார். அழிவின் விளிம்பிலிருப்பதாக சிலர் சொல்லிக் கொண்டிருக்கும் சினிமாவுக்கு கிடைத்த மிகப் பெரிய அங்கீகாரம் இது.

ஐடி ஊழியர், கல்வித் துறை ஊழியர்கள், மருத்துவர்கள், மாணவர்கள், சினிமாக்காரர்கள் என அத்தனை துறை சார்ந்தவர்களும் லிங்கா வெளியீட்டை ஆவலுடன் எதிர்நோக்கியுள்ளனர். பல அரங்குகளில் கார்ப்பரேட் நிறுவனங்களே லிங்கா படத்தின் காட்சிகளை மொத்தமாக முன்பதிவு செய்து வைத்துள்ளனர். சனி, ஞாயிறு மற்றும் அடுத்த வெள்ளி வரை இப்படி மொத்தமாக முன்பதிவு செய்யப்பட்டுள்ள ஷோக்கள் பல.

தமிழ் சினிமா வரலாற்றில் இந்த நிகழ்வுகள் ஒரு அதிசயம் என்றுதான் சொல்ல வேண்டும்.

'ரஜினி படங்கள் விடுமுறை நாளை முன்வைத்து வெளியாவதில்லை. காரணம், ரஜினி படங்கள் வெளியாகும் எந்த நாளும் பொதுவி்டுமுறை நாள்தான்' என ரஜினி குறித்து வெளியான ஒரு கருத்து, இப்போது உண்மையாகிவிட்டது!