ஓம் படத்தின் அடுத்த அப்டேட்.. என்னங்க தனுஷ் இப்படி பல்டி அடிக்கிறாரு.. எப்போ வருது தெரியுமா?

சென்னை: நடிகர் தனுஷ் நடிப்பில் மிகப்பெரிய எதிர்பார்ப்பை ஏற்படுத்தியுள்ள 'ஓம்: சேப்டர் 1 - தி பிளட் வுட்' திரைப்படத்தின் அடுத்த அப்டேட்டை படக்குழு அதிகாரப்பூர்வமாக அறிவித்துள்ளது. தனுஷின் பிறந்தநாளை முன்னிட்டு, இப்படத்தின் முதல் பாடல் வரும் ஜூலை 28-ம் தேதி வெளியாகும் என அறிவிக்கப்பட்டுள்ளது. இந்த அறிவிப்பு வெளியாகியுள்ள நிலையில், ரசிகர்கள் சமூக வலைதளங்களில் கொண்டாடி வருகின்றனர்.

'அமரன்' படத்தின் வெற்றிக்குப் பிறகு இயக்குநர் ராஜ்குமார் பெரியசாமி இயக்கும் படமாக உருவாகி வரும் 'ஓம்', ஆரம்பம் முதலே ரசிகர்கள் மத்தியில் அதிக எதிர்பார்ப்பை உருவாக்கியுள்ளது. வித்தியாசமான கதைக்களத்தில் உருவாகி வரும் இந்தப் படத்தில் தனுஷுடன் இணைந்து மலையாள சூப்பர் ஸ்டார் மம்மூட்டி மற்றும் நடிகை சாய் பல்லவி முக்கிய கதாபாத்திரங்களில் நடித்துள்ளனர். இந்த கூட்டணியே படத்தின் மீதான எதிர்பார்ப்பை மேலும் உயர்த்தியுள்ளது.

ஏற்கனவே வெளியான படத்தின் ஃபர்ஸ்ட் லுக் போஸ்டர்கள் ரசிகர்களிடையே நல்ல வரவேற்பைப் பெற்றன. மழையில் துப்பாக்கியுடன் நிற்கும் தனுஷின் தோற்றமும், ஆக்ஷன் கலந்த போஸ்டர்களும் சமூக வலைதளங்களில் வைரலானது. இதையடுத்து அடுத்த அப்டேட் எப்போது வெளியாகும் என்று ரசிகர்கள் காத்திருந்த நிலையில், தற்போது முதல் பாடல் குறித்த அறிவிப்பு வெளியாகியுள்ளது.

முதல் பாடல் அப்டேட்: படக்குழு வெளியிட்டுள்ள புதிய போஸ்டரில், தனுஷ் உற்சாகமாக நடனமாடும் காட்சி இடம்பெற்றுள்ளது. இதன் மூலம் இது ஒரு கொண்டாட்ட பாடலாக இருக்கும் என்ற எதிர்பார்ப்பு ரசிகர்களிடம் உருவாகியுள்ளது. மேலும், சாய் அப்யங்கர் இசையில் உருவாகியுள்ள இந்தப் பாடல், தனுஷ் பிறந்தநாளை முன்னிட்டு வெளியாக இருப்பதால், ரசிகர்களுக்கு இது சிறப்பு விருந்தாக அமையும் என்று கூறப்படுகிறது.

ரசிகர்கள் மகிழ்ச்சி: தனுஷின் பிறந்தநாளன்று வெளியாகும் இந்த முதல் பாடல், படத்தின் புரமோஷனை அடுத்த கட்டத்திற்கு கொண்டு செல்லும் என்று எதிர்பார்க்கப்படுகிறது. அதேநேரத்தில், 'ஓம்: சேப்டர் 1 - தி பிளட் வுட்' திரைப்படத்தின் டீசர் மற்றும் ரிலீஸ் தொடர்பான அப்டேட்களும் விரைவில் வெளியாகும் என ரசிகர்கள் ஆவலுடன் காத்திருக்கின்றனர். தற்போது முதல் பாடல் அறிவிப்பே சமூக வலைதளங்களில் டிரெண்டாகி வருகிறது.