கத்தி 2 பண்ண பயமா இருக்கு.. ஆனா துப்பாக்கி 2 பண்ற ஐடியா இருக்கு.. ஏஆர் முருகதாஸ் சொன்னத கேளுங்க!

விஜய் -ஏஆர் முருகதாஸ்

ஏஆர் முருகதாஸ் இயக்கத்தில் விஜய் நடிப்பில் கடந்த 2012ம் ஆண்டில் வெளியான படம் துப்பாக்கி. இந்தப் படத்தில் விடுமுறைக்காக தன்னுடைய குடும்பத்தினரை பார்க்க வரும் ராணுவ வீரர், தீவிரவாதத்திற்கு எதிரான செயல்பாடுகளை செய்வதாக கதைக்களம் அமைந்திருந்தது. படத்தில் விஜய்க்கு ஜோடி சேர்ந்திருந்தார் காஜல் அகர்வால்.

ஹாரீஸ் ஜெயராஜ் இசை

இந்தப் படத்திற்கு இசையமைத்திருந்தார் ஹாரீஸ் ஜெயராஜ். சத்யன் உள்ளிட்டவர்களும் படத்தில் இணைந்திருந்தனர். மிரட்டலான திரைக்கதையுடன் ரசிகர்களுக்கு சிறப்பான அனுபவத்தை இந்தப் படம் கொடுத்தது. தன்னுடைய உதவி இயக்குநர் ஜெகன் சக்தியின் கதையை இந்தப் படத்தின்மூலம் இயக்கினார் ஏஆர் முருகதாஸ்.

கத்தி படம்

இந்தப் படத்தை தொடர்ந்து கடந்த 2014ம் ஆண்டில் வெளியானது கத்தி. இந்தப்படம் கார்ப்பரேட் நிறுவனங்களுக்கு எதிராக வெளியான படம். விவசாயத்திற்கு தண்ணீர் இல்லாமல் விவசாயிகள் சிரமப்படும் நிலையில், கார்ப்பரேட் நிறுவனங்கள் தண்ணீரை பேக் செய்து விற்பனை செய்வதை இந்தப் படம் கதைக்களமாக கொண்டு வெளியானது.

இரட்டை வேடங்களில் விஜய்

அழகிய தமிழ் மகன் படத்திற்கு பிறகு இந்தப் படத்தில் விஜய் கதிரேசன் மற்றும் ஜீவானந்தம் என இரட்டை வேடங்களில் கலக்கியிருந்தார். அவருக்கு ஜோடியாகியிருந்தார் சமந்தா. சதீஷ் உள்ளிட்டவர்கள் சிறப்பான கேரக்டர்களில் நடித்திருந்த இந்தப் படம் சூப்பர் டூப்பர் ஹிட்டடித்தது. அனிருத் இசையில் படத்தின் பாடல்களும் சூப்பர் ஹிட்டடித்தன.

சிறப்பான வெற்றி

இந்த இரு படங்களும் விஜய் -ஏஆர் முருகதாஸ் கூட்டணியில் சிறப்பான வெற்றியையும் விமர்சனங்களையும் பெற்ற படங்கள். இந்த இரு படங்களிலும் இரண்டாவது பாகங்களுக்கான லீட்கள் படத்திலேயே கொடுக்கப்பட்டிருக்கும். இந்நிலையில் இந்த படங்களில் இரண்டாவது பாகங்கள் குறித்து ரசிகர்கள் தொடர்ந்து கேட்டு வந்தனர்.

இரண்டாவது பாகங்கள்

இந்நிலையில் இந்தப் படங்களில் இரண்டாவது பாகங்கள் குறித்து சமீபத்திய பேட்டியில் பேசிய ஏஆர் முருகதாஸ், இந்த இரண்டு படங்களும் சூப்பர் ஹிட்டடித்த நிலையில், அடுத்த பாகத்தை மேலும் சிறப்பாக கொடுக்க வேண்டிய கட்டாயம் ஏற்பட்டுள்ளதாகவும், அதனால் சரியான கதைகளுக்காக காத்திருப்பதாகவும் தெரிவித்துள்ளார்.

துப்பாக்கி 2 படம்

இரண்டாவது பாகங்களை இயக்கும்போது நமக்குள் ஒரு வட்டத்தை போட்டுக் கொண்டு அதற்குள் கதையை கொண்டுவருவதற்காக செயல்படும் சூழல் ஏற்பட்டுவிடும் என்பதால் தனக்கு இரண்டாவது பாகத்தை எடுப்பது குறித்த அச்சம் இருப்பதாகவும் ஆனால் துப்பாக்கி 2 படத்தை எடுக்க ஐடியா இருப்பதாகவும் அவர் கூறியுள்ளார்.