“ஆக்‌ஷன் கலந்த குடும்ப சென்டிமென்ட்”.. ரஜினி 168 பற்றி முதன்முறையாக இயக்குநர் சிவா பேட்டி!

சிவா இயக்கத்தில் ரஜினி

இன்னும் பெயரிடப்படாத இப்படத்திற்கு தற்காலிகமாக ரஜினி 168 எனப் பேர் வைக்கப்பட்டுள்ளது. ஏற்கனவே சிவா இயக்கிய படங்களில் எல்லாம் பெரும்பாலும் குடும்ப செண்டிமெண்ட் கொஞ்சம் தூக்கலாகவே இருக்கும். எனவே, ரஜினி 168ம் அப்படிப்பட்ட படமாகத்தான் இருக்கும் என எதிர்பார்க்கப்படுகிறது.

சென்டிமென்ட் தூக்கல்

இது தொடர்பாக சன் நியூசுக்கு பிரத்யேகப் பேட்டி அளித்துள்ளார் இயக்குநர் சிவா. அதில் அவர், "ரஜினி 168 படம் குடும்ப சென்டிமென்ட்கள் நிறைந்த கதைக்களமாக இருக்கும். எனக்கு அப்படியான படங்கள் எடுப்பது தான் மிகவும் பிடிக்கும். அதே சமயம் ஆக்சன் காட்சிகளுக்கும் பஞ்சமிருக்காது. நிச்சயம் இப்படம் ரசிகர்கள் கொண்டாடும் படமாக இருக்கும்" என அவர் தெரிவித்துள்ளார்.

சக்சஸ் பார்முலா

சிவாவின் முந்தைய நான்கு படங்களிலும் அஜித் தான் நாயகனாக நடித்திருந்தார். அதில், வீரம், விஸ்வாசம் ஆகிய இரண்டு படங்கள் கிராமத்து கதைக்களங்களைக் கொண்டிருந்தன. நகரத்து பின்னணியில் அவர் எடுத்த விவேகம் படம் எதிர்பார்த்த வெற்றியைத் தரவில்லை. எனவே, ரஜினி 168 படமும் கிராமியக் கதைக்களமாகத் தான் இருக்கும் எனத் தெரிகிறது.

எதிர்பார்ப்பு

அப்படி இருக்கும் பட்சத்தில் ரஜினி நீண்ட இடைவெளிக்குப் பிறகு நடிக்கும் கிராமத்துப் படமாக இது அமையும். சிவாவின் இயக்கத்தில் ரஜினி நடிக்கிறார் என்ற தகவலால் ரசிகர்கள் மகிழ்ச்சி அடைந்திருக்கின்றனர். இப்படத்தின் கதை இப்படித்தான் இருக்கும் என பல்வேறு யூகங்கள் இப்போதே இணையத்தில் உலா வரத் தொடங்கி விட்டன.