வடிவேலுவை நம்பினேன்.. மகனின் வாழ்க்கை போச்சு.. தயாரிப்பாளர் ஓபன் டாக்

சென்னை: வைகைப்புயல் என்று ரசிகர்களால் கொண்டாடப்படுபவர் வடிவேலு. ராஜ்கிரணால் சினிமாவில் அறிமுகப்படுத்தப்பட்ட அவர் தொடர்ந்து தனது திறமையை வளர்த்துக்கொண்டு தனக்கென தனி சாம்ராஜ்ஜியத்தை உருவாக்கினார். சில பிரச்னைகளால் சினிமாவிலிருந்து ஒதுங்கியிருந்த அவர் நாய் சேகர் ரிட்டர்ன்ஸ் படத்தின் மூலம் ரீ என்ட்ரி கொடுத்தார். தொடர்ந்து மாமன்னன், சந்திரமுகி 2, மாரீசன் என்று நடிப்பில் பிஸியாக இருக்கிறார்.

தமிழ் சினிமாவின் மிகச்சிறந்த நகைச்சுவை நடிகர்களில் ஒருவர் வடிவேலு. ராஜ்கிரணால் அறிமுகப்படுத்தப்பட்ட அவர் கவுண்டமணி, செந்தில் உச்சத்தில் இருந்தபோது அவர்களுடன் சேர்ந்து சிறிய சிறிய கதாபாத்திரங்களில் நடித்தார். அந்தக் காலகட்டத்தில் விவேக்கும் வளர்ந்துவந்தார். எனவே வடிவேலு வளர்வதற்கு கடுமையான போட்டி சூழலே இருந்தது. ஆனால் எதற்கும் அஞ்சவில்லை வடிவேலு. தனக்கு கிடைத்த வாய்ப்புகளை சரியாக பயன்படுத்திக்கொண்டு உழைத்துக்கொண்டே இருந்தார் அவர்.

ஆரோக்கியமான வளர்ச்சி: குறிப்பாக, தன்னுடைய காமெடிகளில் தன்னை தானே தாழ்த்திக்கொண்டு மக்களை சிரிக்க வைத்தார் வடிவேலு. அதேபோல் எந்த ஈகோவும் இல்லாமல் விவேக்குடனும் சேர்ந்து நடித்தார். இதனால் அவரது வளர்ச்சி ஆரோக்கியமாகவே இருந்தது. ஒருகட்டத்தில் வயது மூப்பு காரணமாகவும்; காலம் மாறியதன் காரணமாகவும் கவுண்டமணியும் செந்திலும் சினிமாவிலிருந்து கொஞ்சம் கொஞ்சமாக ஒதுங்க ஆரம்பித்தனர்.

வைகை புயல்: அந்த வெற்றிடத்தை சரியாக பயன்படுத்திக்கொண்டார் வடிவேலு. தனக்கென தனி டீமை செய்து காமெடி செய்து ரகளைகட்டி அடித்தார். இதனால் அவரது வளர்ச்சி 2000களின் தொடக்கத்தில் புயல் வேகத்தில் இருந்தது. அவர் இல்லாத படங்களே இல்லை என்ற நிலைதான் அப்போது இருந்தது. பல படங்களில் நடித்தாலும் ஒவ்வொரு காமெடி காட்சியையும் வித்தியாசமான முறையிலும் புதிய பாணியிலும் நடித்து அப்ளாஸை அள்ளினார் வைகை புயல் வடிவேலு. சூழல் இப்படி இருக்க அவருக்கு ஏற்பட்ட சில நெருக்கடிகளாலும், பஞ்சாயத்துக்களாலும் சினிமாவிலிருந்து ஒதுங்கினார்.

ரசிகர்களுக்கு அதிர்ச்சி: இதனையடுத்து பிரச்னைகள் தீர்க்கப்பட்டு மீண்டும் நடிக்க வந்தார் வடிவேலு. அவர் மீண்டும் சினிமாக்களில் நடிக்க வந்ததால் ரசிகர்கள் உற்சாகமடைந்தாலும் அவ்வப்போது வந்த செய்திகள் பெரும் அதிர்ச்சியை கொடுத்தன. அதாவது அவருடன் நடித்த பலரும் வடிவேலு தங்களை வளர விடவில்லை என்று ஓபனாகவே பேச ஆரம்பித்தனர். முக்கியமாக தன்னை சினிமாவில் அறிமுகப்படுத்திய ராஜ்கிரணையே வடிவேலு மதிப்பதில்லை என்று பலமான குற்றச்சாட்டு எழுந்தது. அதனை பார்த்த ரசிகர்கள் இதுதான் வடிவேலுவின் இன்னொரு முகமா என்று அதிர்ச்சியுடன் கேட்க ஆரம்பித்தனர். இருந்தாலும் மற்றவர்கள் கூறும் குற்றச்சாட்டுக்கள் குறித்து வடிவேலு பெரிதாக ரியாக்ட் செய்துகொள்ளவில்லை.

வீ. சேகர் பேட்டி: இந்நிலையில் தயாரிப்பாளரும், இயக்குநருமான வீ.சேகர் வடிவேலு குறித்து பேசுகையில், "அரசியல் காரணமாக விஜயகாந்த்தை வடிவேலு கீழ்த்தரமாக பேசினார். ஆனால் விஜயகாந்த் அவருக்கு உதவிகளை செய்திருக்கிறார். அப்படி அவர் மோசமாக பேசியதில் நானும் பாதிப்படைந்திருக்கிறேன். சரவணப் பொய்யன் என்ற படத்தினை நான் இயக்கினேன். அதில் எனது மகன் கதாநாயகனாக நடிக்க வைக்க இருந்தேன். ஆனால் அந்தப் படத்தில் வடிவேலுவை முக்கிய கதாபாத்திரத்தில் நடிக்க சொல்லி கேட்டேன்.

அதற்கு வடிவேலு ஒத்துக்கொண்டும் இருந்தார். என்னை எப்படி தூக்கிவிட்டீர்களோ அதேபோல் உங்கள் மகனையும் தூக்கிவிடுகிறேன் என்று சொன்னார். நானும் அதை நம்பி பட வேலைகளை ஆரம்பித்தேன். ஆனால் அரசியலுக்கு சென்ற வடிவேலு பிறகு நடிக்கவில்லை. இனி நடிக்கவும் மாட்டேன் என்று சொல்லிவிட்டார். அதன் பிறகு எனது மகன் படத்தில் விவேக் மற்றும் கருணாஸை நடிக்க வைத்தேன்" என்றார்.