Click it and Unblock the Notifications
காந்தி டாக்ஸ் டிரெய்லர்: ஏ.ஆர். ரஹ்மான் இசையில் விஜய் சேதுபதியின் பேசும் படம்!
சென்னை: ஜீ ஸ்டுடியோஸ், க்யூரியஸ் டிஜிட்டல் பிரைவேட் லிமிடெட், பின்மூன் மெட்டா ஸ்டுடியோஸ் மற்றும் மூவி மில் என்டர்டெயின்மென்ட் ஆகிய நிறுவனங்களின் கூட்டு தயாரிப்பில் உருவாகியுள்ள "காந்தி டாக்ஸ்" திரைப்படத்தின் அதிகாரப்பூர்வ டிரெய்லர் தற்போது வெளியிடப்பட்டுள்ளது. வசனங்கள் இல்லாத இந்த திரைப்படம், வழக்கமான சினிமா மரபுகளை உடைத்து, சவாலான உள்ளடக்கம் மற்றும் தனித்துவமான கதைசொல்லலில் தயாரிப்பு நிறுவனங்களுக்கு இருக்கும் நம்பிக்கையை வெளிப்படுத்துகிறது.
இன்றைய சினிமா உலகம் ஒலியாலும், ஆரவாரத்தாலும் நிறைந்துள்ள நிலையில், "காந்தி டாக்ஸ்" பணிவுடனும், அதே சமயம் ஆழ்ந்த நம்பிக்கையுடனும் களமிறங்குகிறது. டிரெய்லர் எந்த வசனங்களும் இன்றி, கண்கவர் காட்சிகள், பதற்றம் நிறைந்த மௌனம் மற்றும் உணர்வுப்பூர்வமான வெளிப்பாடுகள் மூலம் பல விஷயங்களை பார்வையாளர்களுக்கு கடத்துகிறது. இது வெறும் காதுகளால் கேட்கப்படும் அனுபவமாக இல்லாமல், உள்ளுணர்வுகளால் உள்வாங்கிக்கொள்ளப்படும் ஒரு சினிமா அனுபவமாக அமைகிறது.
விஜய் சேதுபதி, அரவிந்த் சாமி, அதிதி ராவ் ஹைதாரி, சித்தார்த் ஜாதவ் உள்ளிட்ட முன்னணி நட்சத்திரங்களின் நுணுக்கமான, உள்ளார்ந்த நடிப்பும், உணர்வுப்பூர்வமான மோதல்களும் இதில் பிரதானமாக காட்டப்பட்டுள்ளன. வார்த்தைகள் இல்லாததால், நடிகர்களின் முகபாவனைகள் மற்றும் அவர்களின் திரை இருப்பு ஆகியவை கதையின் மையச்சரடாக மாறியுள்ளதை டிரெய்லர் உணர்த்துகிறது.
படம் குறித்த தனது அனுபவத்தைப் பகிர்ந்த நடிகர் விஜய் சேதுபதி, "வார்த்தைகள் இன்றி உணர்ச்சிகளை வெளிப்படுத்த வேண்டும் என்ற சவாலை 'காந்தி டாக்ஸ்' எனக்கு அளித்தது. மௌனமே மிக வலுவான உரையாடலாக மாறும் ஒரு அரிய படைப்பு இது" என்று குறிப்பிட்டார்.
மௌனத்தின் பலத்தை எடுத்துரைத்த அரவிந்த் சாமி, "சத்தத்தில் மூழ்கிய இந்த உலகில், மௌனம் இன்னும் மனசாட்சியை உலுக்கும் என்பதை 'காந்தி டாக்ஸ்' நினைவூட்டுகிறது. இங்கு வார்த்தைகள் விலகி நிற்க, உண்மை அமைதியாக நடைபயணிக்கிறது. ரஹ்மானின் மேதைமை மிக்க இசையே இத்திரைப்படத்தின் மொழியாகிறது" என்று விவரித்தார்.
திரைப்படத்தின் உணர்ச்சிப்பூர்வமான பிணைப்பு பற்றி அதிதி ராவ் ஹைதாரி கூறுகையில், "வார்த்தைகளை விட உணர்வுகள்தான் இதில் என்னை அதிகம் நெகிழ வைத்தது. மௌனமும், நுட்பமான உணர்வுகளும் ஒன்றோடொன்று அழகாக இணையும் படம் இது" எனத் தெரிவித்தார்.
சித்தார்த் ஜாதவ் தனது அனுபவத்தைப் பற்றிப் பகிர்ந்துகொண்டார்: "உரையாடலின்றி இவ்வளவு வலிமையாக உணர்வுகளை வெளிப்படுத்தும் ஒரு படத்தின் அங்கமாக இருப்பது உண்மையிலேயே சிறப்பு. வார்த்தைகளைத் தாண்டி பேசும் சினிமாவின் உலகமொழியை இது மீண்டும் நினைவூட்டுகிறது" என்று எடுத்துரைத்தார்.
கிஷோர் பாண்டுரங் பெலேகரின் இயக்கத்தில் உருவான இந்த படத்திற்கு, இசைஞானி ஏ.ஆர். ரஹ்மான் இசையமைத்துள்ளார். அவரது இசை, கதையின் குரலாக மாறி, ஒவ்வொரு மௌனத்தையும், பதற்றத்தையும், வெளிப்படுத்தப்படாத எண்ணங்களையும் ஆழமான உணர்வாற்றலுடன் வெளிப்படுத்துகிறது.
ஏ.ஆர். ரஹ்மானின் பிரமாண்ட இசை கச்சேரிக்கு மூன்று நாட்களுக்கு முன்பாக, இந்த படத்தின் டிரெய்லரை வெளியிட்டது, படக்குழுவின் துணிச்சலான மற்றும் மரபு மீறிய விளம்பர உத்தியைக் காட்டுகிறது. பாரம்பரிய சினிமா மற்றும் இசையின் இந்த சங்கமம், படத்தின் ஆழமான, அனுபவப்பூர்வமான மற்றும் கலை நோக்கத்தைப் பிரதிபலிக்கிறது.
"காந்தி டாக்ஸ்" படத்தின் மூலம், ஜீ ஸ்டுடியோஸ் மற்றும் பிற தயாரிப்பு நிறுவனங்கள், விதிமுறைகளைத் தாண்டி, நுணுக்கமான நடிப்பைக் கொண்டாடும் மற்றும் இந்திய சினிமாவின் எல்லைகளை விரிவுபடுத்தும் படங்களுக்கான தங்கள் முழு ஆதரவை மீண்டும் உறுதிப்படுத்தியுள்ளன.
"காந்தி டாக்ஸ்" திரைப்படம் உலகமெங்கும் திரையரங்குகளில் 2026 ஜனவரி 30 அன்று வெளியாகிறது.
Continue with Google