துருவ நட்சத்திரம் ரிலீஸாகுதுனு சொன்ன அனிருத்.. சலித்துக்கொண்ட கௌதம் மேனன்.. மனுஷன் பாவம்

சென்னை: விக்ரமை வைத்து கௌதம் மேனன் இயக்கிய துருவ நட்சத்திரம் பட பணிகள் முடிந்து பல வருடங்கள் ஆகிவிட்டன. ஆனால் கடன் பிரச்னையால் அந்தப் படம் இன்னமும் ரிலீஸாகவில்லை. இப்போது ரிலீஸாகிவிடும், அப்போது ரிலீஸாகிவிடும் என்று தகவல்கள் மட்டும் வரும். அதற்கு பிறகு அப்படியே காணாமல் போய்விடும். இந்நிலையில் புதிய வீடியோ ஒன்று சோஷியல் மீடியாவில் ட்ரெண்டகையுள்ளது.

கௌதம் மேனன் பிஸியான இயக்குநராக இருந்தவர். ஏகப்பட்ட ஹிட் படங்களை கொடுத்திருக்கிறார். அவரது பயணம் நன்றாக போய்க்கொண்டிருந்த சூழலில் தயாரிப்பு வேலைகளில் இறங்கினார். அது அவருக்கு பல பிரச்னைகளை உண்டு செய்தது. முக்கியமாக பொருளாதார ரீதியாக அவரை கடுமையான நெருக்கடிக்கு உள்ளாக்கியது. இதற்கிடையே விக்ரமை ஹீரோவாக வைத்து துருவ நட்சத்திரம் படத்தை இயக்கினார்.

Photo Credit:

Anirudh Twitter

கௌதமின் துருவ நட்சத்திரம்: முதலில் இந்தக் கதையை ரஜினியிடம் சொன்னார். அவரும் ஓகே சொல்லும் மனநிலையில்தான் இருந்தாராம். ஆனால் சில காரணங்களால் கடைசி நேரத்தில் அவர் நடிக்கவில்லை. அவரைத் தொடர்ந்து சூர்யாவுக்கும் சென்றது. அவரும் நடிக்க மறுத்துவிட்டார். ரஜினி, சூர்யா மறுத்ததை அடுத்து விக்ரம் ஹீரோவாக கமிட்டானார். அவருடன் சிம்ரன், பார்த்திபன், டிடி என பெரிய நட்சத்திர பட்டாளமே நடித்திருந்தது. அனைத்து வேலைகளும் முடிந்தாலும் படம் ரிலீஸாகவில்லை.

கௌதம் மேனனின் செயல்: கடன் பிரச்னையால்தான் அந்த படம் ரிலீஸாகமால் முடங்கியிருக்கிறது. அதுதொடர்பான வழக்கு நீதிமன்றத்திலும் இருக்கிறது. அண்மையில்கூட கௌதம் மேனன் நீதிமன்றத்தில் ஒரு பிரமாண பத்திரம் தாக்கல் செய்ததார். அதில் தான் யார் யாருக்கு கடன் கொடுக்க வேண்டும் எவ்வளவு கொடுக்க வேண்டும் உள்ளிட்ட விவரங்கள் இருந்ததாக கூறப்படுகிறது.

எப்போதுதான் ரிலீஸ்?: அதுமட்டுமின்றி இந்தக் கடன் தீர்க்கப்பட்டால் ரிலீஸ் செய்வதில் எந்தப் பிரச்னையும் இல்லை. விரைவில் அந்தக் கடன்களை முடித்துவிடுவார் என்று நம்பப்படுகிறது. அதன் காரணமாகத்தான் படம் ரிலீஸ் குறித்து எப்போது அறிவிப்பு வந்தாலும் ரசிகர்கள் ஆவலோடு அந்த நாளுக்கு காத்திருப்பார்கள். ஆனால் சொன்னபடி படம் ரிலீஸாகாது. ஒருகட்டத்தில் ரிலீஸ் பிரச்னையை வைத்து மீம்ஸ்களே வர தொடங்கிவிட்டன.

சலித்துக்கொண்ட கௌதம் மேனன்: இந்நிலையில் கௌதம் மேனனும், அனிருத்தும் மருத்துவம் தொடர்பான விளம்பரத்தில் நடித்திருக்கிறார்கள். அதில் கௌதமிடம் அனிருத், 'சார் துருவ நட்சத்திரம் ரிலீஸ் ஆகுது' என சொல்ல; கௌதமோ சலிப்புடன்,'ம்ம்க்கும்' என கூறுகிறார். உடனே அனியோ,'சார் ரிலீஸ் ஆகுது.நீங்க முதல் நாள் காட்சி போகிறீர்கள். படம் போடாமல் ட்ரெய்லரை மட்டும் போட்டால் எப்படி இருக்கும். அப்படித்தான் சார் ரத்த பரிசோதனையும். ட்ரெய்லர்தான். மெயின் பிக்சர் இல்லை" என சொல்கிறார். இந்த வீடியோவை பார்த்த ரசிகர்களோ, கௌதம் மேனனை வைத்தே அவர் படத்தை கிண்டல் செய்திருக்கிறார்களே என கமெண்ட்ஸ் செய்துவருகிறார்கள்.