Thug Life - தக் லைஃப்.. மணிரத்னத்துக்கு கமல் ஹாசன் போடும் கண்டிஷன் இதுவா?

சென்னை: மணிரத்னமும் கமல் ஹாசனும் இணைந்து ஏற்கனவே நாயகன் என்ற கிளாசிக் படத்தை கொடுத்திருக்கிறார்கள். அந்தப் படம் இன்றுவரை இந்திய சினிமாவின் அடையாளமாக இருக்கிறது. இந்த சூழலில் 30 வருடங்களுக்கு பிறகு இவர்கள் இரண்டு பேரும் இணைந்திருக்கிறார்கள். படத்துக்கு தக் லைஃப் என்று பெயர் வைக்கப்பட்டுள்ளது. விரைவில் ஷூட்டிங் தொடங்கவிருக்கிறது.

கமல் ஹாசன் கடைசியாக விக்ரம் படத்தில் நடித்தார். லோகேஷ் கனகராஜ் இயக்கிய அந்தப் படத்தின் மூலம் தரமான வெற்றியை பதிவு செய்தார். அந்த வெற்றி கொடுத்த உற்சாகத்தால் அடுத்தடுத்து படங்களில் நடிக்க கமிட்டாகியிருக்கிறார். அதன்படி இந்தியன் 2, மணிரத்னம் இயக்கும் படம் ஆகியவை தற்போது கமலின் லைன் அப்பாக இருக்கிறது.

கமல் - மணிரத்னம்: கமல் ஹாசனும் மணிரத்னத்தும் இணைந்து ஏற்கனவே நாயகன் என்ற கல்ட் க்ளாசிக் படத்தை கொடுத்திருக்கிறார்கள். அந்தப் படம் இன்றுவரை சிறந்த அடையாளங்களில் ஒன்றாக இருக்கிறது. தற்போது அவர்கள் இருவரும் மீண்டும் இணைவதால் பெரும் எதிர்பார்ப்பு எழுந்திருக்கிறது. இப்படத்தை ராஜ்கமல் நிறுவனம், மெட்ராஸ் டாக்கீஸ் நிறுவனம், ரெட் ஜெயண்ட் நிறுவனம் இணைந்து தயாரிக்கின்றன. ஏ.ஆர்.ரஹ்மான் இசையமைக்கிறார்.

டைட்டில் இன்ட்ரோ: இந்த சூழலில் படத்தின் பூஜையும், டீசர் ஷூட்டிங்கும் சில மாதங்களுக்கு முன்பு நடந்தது. அதில் கமல், மணிரத்னம் மற்றும் படத்தில் பணியாற்றும் தொழில்நுட்ப கலைஞர்கள் கலந்துகொண்டனர். அதனையடுத்து கமல் ஹாசனின் பிறந்தநாளை முன்னிட்டு நவம்பர் 6ஆம் தேதி படத்தின் டைட்டில் இன்ட்ரோ வீடியோ வெளியிடப்படும் என அறிவிக்கப்பட்டது.

ரங்கராய சக்திவேல் நாயக்கன்: அதன்படி படத்தின் இன்ட்ரோ வீடியோ அன்றைய தினம் வெளியிடப்பட்டது. அதில் வெட்டவெளியில் உடல் முழுவதும் துணியை உடலில் சுற்றிக்கொண்டு நிற்கும் கமல் ஹாசன், என் பெயர் ரங்கராய சக்திவேல் நாயக்கன்.. காயல்பட்டினக்காரன் என கூறுவது போன்றும் அவரை எதிரிகள் தாக்க வரும்போது அதற்கு பதில் தாக்குதல் நடத்தும்படியும் காட்சிகள் இருந்தன.படத்துக்கு தக் லைஃப் (Thug Life) என்று பெயர் வைக்கப்பட்டிருக்கிறது.

ஷூட்டிங் அப்டேட்: இப்படத்தில் திரிஷா, ஜெயம் ரவி உள்ளிட்டோர் நடிக்க கமிட்டாகியிருக்கின்றனர். ஏற்கனவே மன்மதன் அன்பு, தூங்கா வனம் ஆகிய படங்களில் கமல் ஹாசனுடன் இணைந்து நடித்திருந்தார் திரிஷா. இதனையடுத்து தற்போது மூன்றாவது முறையாக கமலுடன் நடிக்கிறார். இந்தச் சூழலில் தக் லைஃப் படத்தின் ஷூட்டிங் இந்த மாத இறுதியில் கண்டிப்பாக தொடங்கிவிடும் என்று தகவல்கள் வெளியாகி கமல் ரசிகர்களை உற்சாகப்படுத்தியது.

விரைவில் ஷூட்டிங்: இந்நிலையில் படத்தின் ஷூட்டிங் பற்றிய புதிய தகவல் சில நாட்களுக்கு முன்பு வெளியானது. அதன்படி 22ஆம் தேதி கமல் ஹாசன் போர்ஷனுக்கான ஷூட்டிங்கை தொடங்க மணிரத்னம் திட்டமிட்டிருப்பதாக கூறப்படுகிறது. இந்த சூழலில் படத்தின் ஷூட்டிங்கை மே மாதத்துக்குள் ஒரேகட்டமாக முடித்துவிட மணிரத்னத்துக்கு கமல் ஹாசன் கண்டிஷன் போட்டிருப்பதாக பேச்சு எழுந்திருக்கிறது. இதனால் படப்பிடிப்பு பணிகள் ஜரூராக தொடங்கவிருக்கிறது.