80 வயதை தொட்ட இந்திய சூப்பர் ஹீரோ.. அமிதாப் பச்சனுக்கு பிறந்தநாள் வாழ்த்து சொன்ன ரஜினிகாந்த்!

80வது பிறந்தநாள்

1942ம் ஆண்டு அக்டோபர் 11ம் தேதி பிறந்த பாலிவுட் திரையுலகின் முன்னணி சூப்பர்ஸ்டார் நடிகர் அமிதாப் பச்சன் இன்று தனது 80வது பிறந்தநாளை கோலாகலமாக கொண்டாடி வருகிறார். சினிமா பிரபலங்கள், அரசியல் தலைவர்கள், விளையாட்டு வீரர்கள், தொழிலதிபர்கள் என பலரும் அவருக்கு பிறந்தநாள் வாழ்த்து தெரிவித்து வருகின்றனர்.

பிக் பி

1969ம் ஆண்டு வெளியான சாத் இந்துஸ்தான் படத்தின் மூலம் பாலிவுட்டில் அறிமுகமானவர் அமிதாப் பச்சன். முதல் படத்திலேயே சிறந்த அறிமுக நடிகருக்கான தேசிய விருதை தட்டிச் சென்றார். அமர் அக்பர் அந்தோனி, த்ரிசூல், டான், தோஸ்தானா, சக்தி, மகான், சாஹேன்ஷா, தீவார் உள்ளிட்ட பல படங்களில் முன்னணி நடிகராக நடித்து பாலிவுட்டின் பிக் பி என்றே அழைக்கப்பட்டு வருகிறார். அமிதாப் பச்சன், பல இளம் தலைமுறை நடிகர்களுடன் இணைந்து நடித்தும் கலக்கி உள்ளார்.

ரஜினிகாந்த் வாழ்த்து

80வது பிறந்தநாளை கொண்டாடி வரும் நடிகர் அமிதாப் பச்சனுக்கு ரஜினிகாந்த் சூப்பரான வாழ்த்தை தனது ட்விட்டர் பக்கத்தில் பதிவிட்டுள்ளார். தி லெஜண்ட்.. எனக்கு எப்போதுமே இன்ஸ்பிரேஷனாக இருக்கும் ஒரு நபர், இந்திய சினிமாவின் இணையற்ற நடிகர் சூப்பர் ஹீரோ அமிதாப் பச்சன் 80வது வயதில் அடியெடுத்து வைக்கிறார். அவருக்கு அன்பும் மரியாதையும் கலந்த பிறந்தநாள் வாழ்த்துக்கள் என ரஜினிகாந்த் வாழ்த்து தெரிவித்துள்ளார்.

11 படங்கள் ரீமேக்

அமிதாப் பச்சனின் 11 படங்களை தமிழில் ரீமேக் செய்து நடித்துள்ளார் நடிகர் ரஜினிகாந்த். அமர் அக்பர் அந்தோணி படத்தை தமிழில், சங்கர் சலீம் சைமன் எனும் பெயரில் ரீமேக் செய்து நடித்துள்ளார். மஜ்பூர் படத்தின் தமிழ் ரீமேக்கான நான் வாழவைப்பேன் படம், எல்லாருக்குமே தெரிந்த பில்லா திரைப்படம் அமிதாப் பச்சனின் டான் படத்தின் ரீமேக் தான். கஸ்மே வாடே - தர்மத்தின் தலைவன் ஆனது. தீவார் - தீ ஆனது. த்ரிசூல் - மிஸ்டர் பாரத், லாவாரிஸ் - பணக்காரன், மர்ட் - மாவீரன், மேலும், சிவா, வேலைக்காரன் உள்ளிட்ட படங்களும் அமிதாப் பச்சனின் இந்தி படங்களே என்பது குறிப்பிடத்தக்கது.