கமலின் நாயகனுக்கு பிறகு விஜயின் துப்பாக்கிக்கு கிடைத்த பெருமை?

By Siva

Updated: Sunday, January 13, 2013, 15:25 [IST]

சென்னை: ஐஎம்டிபி என்னும் உலகப் புகழ்பெற்ற சினிமா இணையதளம் விஜய் நடித்த துப்பாக்கி படத்திற்கு 10க்கு 8.3 மதிப்பெண்கள் வழங்கியுள்ளது என்று முருகதாஸ் ட்விட்டரில் தெரிவித்துள்ளார்.

ஐஎம்டிபி என்னும் உலகப் புகழ்பெற்ற சினிமா இணையதளம் ஹாலிவுட், பாலிவுட், கோலிவுட் உள்பட பல உட் படங்களுக்கு தனது இணையதளத்தில் மதிப்பெண்கள் அளிக்கும். அதில் எந்த படம் அதிக மதிப்பெண்கள் வாங்குகிறதோ அது கண்டிப்பாக ஹிட் என்றே கூறலாம். இந்த இணையதளம் பற்றி அறிந்தவர்கள் ஒரு படம் ரிலீஸானதும் அதைப் பார்க்கலாமா, வேண்டாமா என்பதை ஐஎம்டிபி அளிக்கும் மதிப்பெண்களை வைத்தே முடிவு செய்கின்றனர்.

ஐஎம்டிபியும் அவ்வளவு சீக்கிரத்தில் ஒரு படத்திற்கு அதிக மதிப்பெண்கள் கொடுத்துவிடாது. அதனால் அது அதிக மதிப்பெண்கள் அளிக்கும் படத்தை நம்பிப் பார்க்கலாம். அப்படிப்பட்ட ஐஎம்டிபியிடம் அதிக மதிப்பெண்கள் வாங்கிய 3 இந்திய படங்களில் 2 கோலிவுட் படங்கள் அடக்கம் என்று உங்களுக்கு தெரியுமா?

கமலின் நாயகன்

வேலு நாயக்கராக கமல் ஹாசன் நடித்து 1987ம் ஆண்டு வெளியான நாயகன் படத்திற்கு ஐஎம்டிபி 10க்கு 8.3 மதிப்பெண்கள் வழங்கியது. நாயகன் சூப்பர் ஹிட் என்று உங்களுக்கே தெரியும்.

ஆமீர் கானின் 3 இடியட்ஸ்

நாயகனுக்கு பிறகு 22 ஆண்டுகள் கழித்து கடந்த 2009ம் ஆண்டு ரிலீஸான ஆமீர் கான் நடித்த 3 இடியட்ஸ் படத்திற்கு தான் ஐஎம்டிபி 8.3 மதிப்பெண்கள் அளித்தது. 3 இடியட்ஸ் வசூலை அள்ளிக் குவித்த படமாகும்.

விஜயின் துப்பாக்கி

3 இடியட்ஸுக்குப் பிறகு 3 ஆண்டுகள் கழித்து 2012ல் வெளியான விஜயின் துப்பாக்கி படத்திற்கு தற்போது ஐஎம்டிபி 8.3 மதிப்பெண்கள் அளித்துள்ளது என்று இயக்குனர் முருகதாஸ் ட்விட்டரில் தெரிவித்துள்ளார்.( ஆனால் அந்த இணையதளத்தில் துப்பாக்கிக்கு 8.1 மதிப்பெண்கள் தான் உள்ளது.)