Click it and Unblock the Notifications
விஜய்யை அட்டாக் செய்வதற்காக சீரிஸ் எழுதும் ஜேம்ஸ் வசந்தன்.. ஆத்தாடி மொரட்டு அடியா இருக்கே ப்பா!
சென்னை: விஜய் தமிழ்நாட்டின் முதலமைச்சரானதிலிருந்து அவரது செயல்பாடுகளை வைத்து பலரும் விமர்சனத்தை முன்வைத்துவருகிறார்கள். சுப்ரமணியபுரம், ஈசன் உள்ளிட்ட படங்களுக்கு இசையமைத்த ஜேம்ஸ் வசந்தனோ; விஜய் கட்சி ஆரம்பித்ததிலிருந்தே கடுமையான விமர்சனத்தை முன்வைத்துவருகிறார். இப்போதோ முதலமைச்சராக விஜய்யின் செயல்பாடுகள் பற்றி விமர்சிக்க தொடங்கியிருக்கும் அவர்; அதை வைத்து முகநூலில் தொடரையும் எழுத தொடங்கியிருக்கிறார்.
இதுகுறித்து அவர் ஏற்கனவே முதலில் வெளியிட்டிருந்த பதிவில் காட்டமான கருத்துக்களை முன்வைத்திருந்தார். இப்போது இரண்டாவது அத்தியாயத்தில் அவர், "இத்தொடரை தொடர்வதற்கு முன் நடிகர் விஜய் ரசிகர்களுக்கு ஒன்றைச் சொல்ல விரும்புகிறேன். என்னுடைய கருத்துகள் உங்களுக்கு வெறுப்பாகத்தான் இருக்கும். இவற்றை வாசிக்கவேண்டாம். வாசித்துதான் ஆவேன் என்றால், வாசித்துவிட்டுப் போங்கள். எதிர் கருத்து இடவேண்டுமென்றால் தாராளமாக இடுங்கள்.
மனதில் கொண்டு பேசுங்கள்: அசிங்கமான சொற்களைப் பயன்படுத்துவது, கெட்ட வார்த்தை பேசுவது இதுதான் உங்களுக்குத் தெரியும் என்றால், என் பக்கத்தில் இருந்து நீங்கள் விலகிவிடுவது எல்லாருக்கும் நல்லது. இதுவரை ஒரேயொரு அரசியல் கட்சியினர்தான் இந்த வேலையை மெனக்கெட்டுச் செய்துவந்தனர். ஆனால் நீங்கள் அவர்களையெல்லாம் தூக்கிச் சாப்பிட்டு விட்டீர்கள். அதை எங்கு வேண்டுமானாலும் செய்துகொள்ளுங்கள். என்னுடைய பக்கத்தில் வேண்டாம். ஒரு கட்சியின், கட்சியின் தலைவரின் தரம் அவர் ஆதரவாளர்கள் வழியாகத்தான் வெளிப்படும். இதை மனத்தில் கொண்டு பேசுங்கள்.
விஜய் ஒரு பொய்க்காரர்: திமுக தீய கட்சி எனச் சொல்லி எதையெல்லாம் அதற்குக் காரணங்களாகச் சொன்னாரோ, அவை அனைத்தையும் இந்த 25 நாட்களில் பல மடங்கு இவர் செய்துகொண்டிருக்கிறார்; இவர் ஆட்சியில் நிகழ்ந்துகொண்டிருக்கிறது. இதை மக்கள் பார்த்துக்கொண்டுதான் இருக்கிறார்கள். விஜய் ஒரு பொய்க்காரர் என்று நான் தேர்தலுக்கு முன்பே சொல்லிவந்தேன். அதை இப்போது ஆணித்தரமாக நிரூபித்து வருகிறார். கவர்ச்சியினால் மயங்கிய ரசிகர்கள் அவர் அரசியல் பேச்சை நம்பினார்கள்; பெண்கள் ஏமாந்தார்கள். அவையெல்லாம் கொஞ்சம் கொஞ்சமாக வெளிப்பட்டு வருகிறது.
அப்படி யாரும் செய்வார்களா?: உண்மையிலேயே நல்லவன் ஒருவன் எவனாவது தன்னை தூயவன் எனச் சொல்லிக் கொள்வானா? தன்னைத்தானே இப்படி அழைத்துக்கொள்வானா? இந்த யதார்த்த உண்மை நான் சொல்லித்தான் உங்களுக்குத் தெரிய வேண்டுமென்பதில்லை. அப்படிச் சொல்லும்போதே நாம் ஒருவனை சரியான ஆள் இல்லையென்று புரிந்துகொள்வோம்.
உண்மைகளை உணர்கிறார்கள்: ஆனாலும் விஜய் இப்படிப் பேசுவதற்குக் காரணமே தன் பின்னே இருக்கிற ஏமாந்த கூட்டத்தை நம்பித்தானே? எது சொன்னாலும் விசிலடிக்க ஒரு கோடியே 60 லட்ச மந்தை ஆடுகள் இருக்கும்போது அவர் இப்படித்தான் பேசுவார்; அவர்கள் விழித்துக்கொள்ளும் வரை! இப்போது திருச்சி மாநாட்டில் அந்தப் பொய்களை மீண்டும் பேசி அவர்கள் வசிய மயக்கத்திலிருந்து விழித்துவிடாதபடி பார்த்துக்கொண்டிருக்கிறார். ஆனாலும், சிலர் உண்மைகளை உணரத் தொடங்கிவிட்டார்கள்.
தண்ணீராக ஓடியது: வாக்குக்குப் பணம் தரவில்லை என்கிறார். பல தொகுதிகளில் பிற கட்சிகளைப் போலவே இவர் வேட்பாளர்களும் தந்ததை அவர் ரசிகர்களே அறிவார்கள். அவருடைய சென்னைத் தொகுதியிலேயே சில பகுதிகளில் கொடுக்கப்பட்டது. சேலத்தில் கொடுக்கப்பட்டது. வில்லிவாக்கத்தில் தண்ணீராக ஓடியது.
இவர்கள் ஆதரவு தேடிச்சென்ற லால்குடி அதிமுக வேட்பாளர் ஒவ்வொரு வாக்குக்கும் எவ்வளவு கொடுத்தார் என்கிற உண்மை எல்லாருக்கும் தெரிந்தால் அதிர்ச்சியடைவீர்கள். வாங்கிய மக்களைக் கேளுங்கள். இது ஏதோ சிலருக்கும் மட்டும் தெரிந்த ரகசியம் அல்ல. அந்தத் தொகுதியிலுள்ள பல்லாயிரக்கணக்கான மக்களிடம் விசாரித்து அறிந்துகொள்ளுங்கள்.
வாக்குக்குப் பணம் கொடுத்த/வாங்கிய யாரும் வெளிப்படையாகச் சொல்லமுடியாத தகவல் இது. அதனால் நீங்கள் உள்ளேயே விசாரித்துப் பார்த்து உறுதிசெய்து கொள்ளுங்கள். சாதி, மதம் பார்க்காமல் வேட்பாளர்களை நிறுத்திய ஒரே கட்சி என்கிறார். தொகுதி வாரியாக எந்த மத, சாதி வேட்பாளர்களை எங்கெல்லாம் நிறுத்தினார் என்று சமூக வலைதளம் முழுக்க அந்தத் தகவல் பரவிக் கிடக்கிறது. வாசித்துப் பார்த்துக் கொள்ளுங்கள். அவருடைய வாக்குறுதிப் பட்டியலும் பெரிது; அதில் எதையும் செய்யாமல் மக்களை ஏமாற்றுகிற பட்டியலும் பெரிது. அவற்றை அடுத்தப் பகுதியில் பேசுவோம்" என குறிப்பிட்டிருக்கிறார்.
Continue with Google