காதலனுடன் தங்கிய ஜப்பான் பாப் பாடகி... மொட்டை போட்டு மன்னிப்பு கேட்ட பரிதாபம்

News

oi-Jaya

By Mayura Akilan

| Published: Saturday, February 2, 2013, 18:15 [IST]

டோக்கியோ: ஜப்பானில் பாப் பாடகி ஒருவர் காதலனுடன் தங்கியதாக எழுந்த சர்ச்சையை தனது கூந்தலை மொட்டையடித்துக் கொண்டு பகிரங்க மன்னிப்பு கேட்டுக்கொண்டுள்ளார்.

ஜப்பானில் முற்றிலும் பெண்களே பங்கேற்கும் ஏ.கே.பி.48 என்ற பாப் இசைக்குழு கடந்த 2005ம் ஆண்டு தொடங்கப்பட்டது. 16 முதல் 20 வயதுக்குட்பட்ட சுமார் 90 பெண்கள் இந்த இசைக்குழுவில் பாடகிகளாக உள்ளனர்.

ஜப்பானையும் தாண்டி ஆசியா கண்டம் முழுவதும் ஏ.கே.பி.48 இசைக்குழு பிரபலமடைந்துள்ளது.

இந்த இசைக்குழுவில் இடம் பெற்றுள்ள பாடகிகளுக்கு நிர்வாகத்தின் சார்பில் சில கட்டுப்பாடுகள் விதிக்கப்பட்டுள்ளது. அதில், ஆண் நண்பர்களுடன் நெருக்கமாக பழகக்கூடாது என்பது முக்கிய கட்டுப்பாடு ஆகும்.

இந்த கட்டுப்பாட்டை மீறி, வேறொரு இசைக்குழுவில் பணியாற்றும் அலன் ஷிராஹாமா என்ற வாலிபரின் வீட்டிலிருந்து ஏ.கே.பி.48 பாடகி மினாமி மினேகிஷி வெளியே வரும் புகைப்படத்துடன் கூடிய செய்தி நேற்று ஜப்பான் பத்திரிகைகளில் வெளியாகின.

இந்த செய்தி வெளியான சில மணி நேரத்திற்குள் தனது தலைமுடியை மொட்டை அடித்துக்கொண்ட மினாமி மினேகிஷி வீடியோ மூலம் ரசிகர்களிடம் மன்னிப்பு கேட்டார்.

இப்படி மன்னிப்பு கேட்பதால் மட்டும் எனது தவறு நியாயமாகிவிடும் என்று நான் கருதவில்லை. இந்த இசைக்குழுவில் இருந்து வெளியேற்றப்பபடுவதை நான் விரும்பவில்லை.

நான் செய்த தவறுக்காக வருத்தப்படுகிறேன். எனது ரசிகர்களும், இசைக்குழுவின் நிர்வாகிகளும் என் தவறை மன்னித்து என்னை ஏற்றுக்கொள்ள வேண்டும் என்று கண்ணீர் மல்க அந்த வீடியோவில் அவர் பேசியுள்ளார்.

ஆண் நண்பருடன் பழகியதற்காக பாப் பாடகி ஒருவர் கூந்தலை மொட்டையடித்துக்கொண்டு அழுத சம்பவம் பரபரப்பாக பேசப்படுகிறது.