இந்தியன் 2 என்ன ஆச்சு? விக்ரம் பிரஸ் மீட் விழாவில் மனம் திறந்து பேசிய கமல்ஹாசன்!

யுஏ சான்றிதழ்

இயக்குநர் லோகேஷ் கனகராஜ் இயக்கத்தில் கமல்ஹாசன், விஜய்சேதுபதி, பகத் ஃபாசில் மற்றும் சூர்யா நடிப்பில் உருவாகி உள்ள விக்ரம் திரைப்படத்திற்கு யு/ஏ சான்றிதழ் வழங்கப்பட்டுள்ளது. படத்தின் நீளம் சுமார் 2 மணி நேரம் 53 நிமிடங்கள் என்பதால், விக்ரம் படம் சற்று பெரிய படமாகவே இருக்கப் போவது உறுதி.

விக்ரம் 3

1986ம் ஆண்டு வெளியான கமல்ஹாசனின் விக்ரம் படத்தின் தொடர்ச்சியாகவே இந்த விக்ரம் படம் இரண்டாம் பாகம் போல உருவாக்கப்பட்டு இருக்கும் என்றும், விரைவில் விக்ரம் படத்தின் 3ம் பாகமும் வெளியாகும் என்கிற அப்டேட்டை கமல்ஹாசனே நேற்று நடந்த விழாவில் அறிவித்து இருப்பது ரசிகர்களை உற்சாகத்தில் ஆழ்த்தி உள்ளது.

இந்தியன் 2 வரும்

விஸ்வரூபம் 2 படத்திற்கு பிறகு இயக்குநர் ஷங்கர் மற்றும் கமல்ஹாசன் கூட்டணியில் ஆரம்பிக்கப்பட்ட இந்தியன் 2 திரைப்படம் 60 சதவீத படப்பிடிப்புகள் நடைபெற்ற நிலையில், சில பல பிரச்சனைகள் காரணமாக அப்படியே நிறுத்தி வைக்கப்பட்டு இருக்கிறது. இந்தியன் 2 இனிமே வராது என தகவல்கள் வெளியான நிலையில், பிரஸ் மீட்டில் இதுகுறித்து கமலிடம் கேள்வி எழுப்பிய நிலையில், அதற்கான பேச்சுவார்த்தைகள் போய்க் கொண்டிருக்கிறது, இந்தியன் 2 படப்பிடிப்பு விரைவில் தொடங்கும் எனக் கூறியுள்ளார்.

லைகா ஆர்வம்

டான் படத்தின் வெற்றியைத் தொடர்ந்து பொன்னியின் செல்வன் படத்தை ரிலீஸ் செய்யும் பணிகளில் ஈடுபட்டு வரும் லைகா நிறுவனம் ஷங்கர் - கமல் கூட்டணியில் பல கோடி பட்ஜெட்டில் உருவாக்கப்பட்டு வந்த இந்தியன் 2 படத்தை எப்படியாவது முடித்து ரிலீஸ் செய்யவேண்டும் என்கிற ஆர்வத்தில் இருக்கிறது.

ஷங்கர் வருவாரா

இந்தியன் 2 படம் நிறுத்தப்பட்டதால் அப்செட்டான இயக்குநர் ஷங்கர் டோலிவுட்டில் ராம்சரண் படத்தை இயக்கி வருகிறார். அதற்கு அடுத்து பாலிவுட்டில் ரன்வீர் சிங் படத்தை இயக்க உள்ளார். பேச்சுவார்த்தைகள் சுமூகமாக முடிந்தால், ராம்சரண் படத்தை முடித்து விட்டு இந்தியன் 2 படத்தையும் ரன்வீர் சிங் படத்தையும் ஒரே நேரத்தில் ஆரம்பிப்பாரா? இல்லை என்ன செய்யப் போகிறார் என்கிற ஏகப்பட்ட கேள்விகள் எழுந்துள்ளன.