வசூல் ராஜா இப்போ டபுள் டாக்டர்.. கமலுக்கு டாக்டர் பட்டம் வழங்கிய ஒடிசா முதல்வர்!

டபுள் டாக்டர்

வசூல் ராஜா எம்.பி.பி.எஸ் படத்தில் ஆள்மாறாட்டம் செய்து டாக்டராக நடித்த நடிகர் கமல்ஹாசனுக்கு தற்போது ஒடிசா முதல்வர் கையால், கெளரவ டாக்டர் பட்டம் கிடைத்துள்ளது. இதற்கு முன்னதாக கடந்த 2005ம் ஆண்டு, சத்யபாமா பல்கலைக்கழகம் நடிகர் கமல்ஹாசனுக்கு கெளரவ டாக்டர் பட்டம் வழங்கியிருந்தது குறிப்பிடத்தக்கது.

கமல் 60

தனது 5வயதில் களத்தூர் கண்ணம்மா படத்தில் நடிக்க வந்த நடிகர் கமல்ஹாசன், தனது 65 வயதில், 60 ஆண்டுகள் சினிமா துறையில் நடிகராகவும், இயக்குநராகவும், தயாரிப்பாளராகவும், பாடகராகவும், நடன ஆசிரியராகவும், பாடலாசிரியராகவும், பல்வேறு கதாபாத்திரங்களில் நடித்து உலக நாயகனாக உயர்ந்துள்ளதை பாராட்டி கடந்த ஞாயிறன்று திரைப்பிரபலங்கள் புடைசூழ ‘உங்கள் நான்' எனும் மாபெரும் விழா நடத்தப்பட்டது.

அரசியல் அறிவுரை

சினிமா மற்றும் அரசியல் என இரட்டை குதிரைகளில் சவாரி செய்து வரும் இந்த சகலகலா வல்லவன், ஒடிசா முதல்வர் நவீன் பட்நாயக்கிடம், தனது மக்கள் நீதி மய்யத்திற்கான அரசியல் அறிவுரைகளையும் கேட்டுத் தெரிந்து கொண்டதாக தகவல்கள் வெளியாகியுள்ளன.

பட்டாம்பூச்சி பூங்கா

ஒடிசாவின் புவனேஷ்வரில் உள்ள செஞ்சுரியன் பல்கலைக்கழகம் நடிகர் கமல்ஹாசனின் 60 ஆண்டுகால கலை சேவையை பாராட்டி கெளரவ டாக்டர் பட்டத்தை வழங்கியுள்ளது. நடிகர் கமல்ஹாசனின் தயாரிப்பு நிறுவனமான ராஜ்கமல் சார்பில், அந்த பல்கலைக்கழகத்தில் மாணவர்கள் நலனுக்காக பட்டாம்பூச்சி பூங்கா ஒன்றை கமல் நிறுவியுள்ளார்.