நாசருக்கு சினிமா தான் மூச்சு.. வதந்தியை பரப்ப வேண்டாம்.. டென்ஷனான கமீலா நாசர்!

நடிகர் நாசர்

கதாநாயகர்களுக்கு என்று பல இலக்கணங்கள் உண்டு, ஆனால் வில்லன் நடிகர்களுக்கு இலக்கணமே இல்லை. முரட்டுத்தனமாக, சற்று தடித்த மீசையுடன் இருந்தால் போதும். அப்படி தனது வித்தியாசமான 'மூக்கால்' வில்லன் நடிகர் என்று பேரெடுத்து கொடிகட்டி பறந்தவர் நடிகர் நாசர். முரட்டுத்தனமான வில்லன், கோபக்கார போலீஸ், கெட்ட போலீஸ் என வெரைட்டி வெரைட்டி கதாபாத்திரத்தில் நடித்து தனக்கென தனிஇடத்தை பிடித்தார் நாசர்.

30 ஆண்டு சினிமா பயணம்

சினிமாவில் 30 ஆண்டுகளுக்கும் மேலாக நடிகராக வலம் வந்து கொண்டிருக்கும் நாசர். தென்னிந்திய நடிகர் சங்கத்தின் தலைவராகவும் உள்ளார். கடந்த ஏப்ரல் மாதம் அசோக் செல்வன் நடிப்பில் வெளியான ஹாஸ்டல் படத்தில் நடித்திருந்தார். அதுமட்டும் இல்லாமல் வாய்தா என்ற படத்தில் வழக்கறிஞராகவும் நடித்து வருகிறார்.

நடிக்க மாட்டார்

கடந்த சில நாட்களாக சமூகவலைத்தள பக்கத்தில் நடிகர் நாசர் உடல்நலக்குறைவால் இருப்பதாகவும் அதனால் அவர் இனி சினிமாவில் நடிக்கப் போவதில்லை என்றும், சினிமாவை விட்டுவிலக போவதாகவும் தகவல்கள் பரவியது. இந்த வதந்தி காட்டுத்தீ போல் சோஷியல் மீடியாவில் பரவி அனைவரையும் அதிர்ச்சியில் ஆழ்த்தியது.

முற்றுப்புள்ளி

இந்நிலையில், இந்த வதந்திகளுக்கு நாசரின் மனைவி கமீலா நாசர் முற்றுப்புள்ளி வைத்துள்ளார். இது தொடர்பாக தனது ட்விட்டர் பக்கத்தில் விளக்கமளித்துள்ள கமீலா, நாசரின் உடல் நிலை குறித்தும், அவர் இனி நடிக்க மாட்டார் என்றும் வதந்திகள் பரவி வருகின்றன. இதனை தொடக்கி வைத்தவர் நீண்ட நாட்கள் வாழ்ந்து இன்னும் பலர் குறித்து வதந்திகளை பரப்ப வேண்டும். நாசர் சினிமாவை தான் சுவாசிக்கிறார், அது தான் அவரது உணவு. அக்கறை காட்டிய நண்பர்களுக்கும் நன்றி. தவறான செய்திகளை பரப்ப வேண்டாம் என்று பதிவிட்டுள்ளார்.