கமல்ஹாசனின் பேர் சொல்லும் பிள்ளையாக கவின்.. அடடே எல்லாம் சிறப்பாக தொடங்கிடுச்சே

சென்னை: தமிழ் சினிமாவில் அடுத்தடுத்து வித்தியாசமான கதைகளைத் தேர்வு செய்து, தனக்கென தனி ரசிகர் பட்டாளத்தை உருவாக்கியுள்ள நடிகர் கவின், தற்போது புதிய படத்தின் மூலம் மீண்டும் ரசிகர்களின் கவனத்தை ஈர்த்துள்ளார். சமீபத்தில் நயன்தாராவுடன் இணைந்து நடித்துள்ள ஹாய் திரைப்படத்தின் ரிலீஸுக்காக காத்திருக்கும் நிலையில், அவரது அடுத்த படத்தின் பூஜை இன்று எளிமையான முறையில் நடைபெற்றுள்ளது. அதிலும், படத்தின் டைட்டிலாக 'பேர் சொல்லும் பிள்ளை' அறிவிக்கப்பட்டிருப்பது ரசிகர்களிடையே கூடுதல் எதிர்பார்ப்பை ஏற்படுத்தியுள்ளது.

அதாவது, தமிழ் சினிமாவின் பல இளம் நடிகர்களில் மிகவும் வேகமாக முன்னேறி வரும் நடிகராக கவின் பார்க்கப்படுகிறார். டாடா படத்தின் வெற்றிக்குப் பிறகு கதைகளின் தேர்வில் கூடுதல் கவனம் செலுத்தி வரும் அவர், ஒவ்வொரு படத்திற்கும் தனித்துவமான அடையாளத்தை உருவாக்க முயற்சி செய்து வருகிறார். தற்போது நயன்தாராவுடன் இணைந்து நடித்துள்ள ஹாய் திரைப்படமும் விரைவில் வெளியாகவுள்ளதால், அவரது ரசிகர்கள் மத்தியில் ஏற்கனவே எதிர்பார்ப்பு அதிகரித்துள்ளது.

அடுத்த படம்: இப்படிப்பட்ட சூழலில், கவினின் அடுத்த படத்தின் பூஜை இன்று கோலாகலமாக நடைபெற்றுள்ளது. இந்தப் படத்திற்கு 'பேர் சொல்லும் பிள்ளை' என்ற தலைப்பு வைக்கப்பட்டுள்ளது. இந்த தலைப்பை நடிகர் கமல்ஹாசன் வழங்கியிருப்பது படத்திற்கு கூடுதல் கவனத்தைப் பெற்றுத் தந்துள்ளது. பூஜை நிகழ்ச்சியில் படக்குழுவினர், தயாரிப்பாளர்கள் மற்றும் திரையுலக பிரபலங்கள் பலரும் கலந்து கொண்டு படக்குழுவை வாழ்த்தினர். வெளியிடப்பட்ட புகைப்படங்களில் பாரம்பரிய வேஷ்டி-சட்டையில் கவின் தோன்றியிருப்பதும், படத்தின் நாயகியுடன் எடுத்துக் கொண்ட புகைப்படங்களும் சமூக வலைதளங்களில் வேகமாக பரவி வருகின்றன.

கமலுக்கு நன்றி: இந்நிலையில், இந்த அறிவிப்பை நடிகர் கவின் தனது சமூக வலைதளப் பக்கத்தில் பகிர்ந்துள்ளார். அதில், "என்னுடைய அடுத்த படத்திற்கு பேர் சொல்லும் பிள்ளை என்ற தலைப்பு அமைந்திருப்பது மிகப்பெரிய கவுரவம். இந்த தலைப்பை வழங்கிய கமல்ஹாசன் சாருக்கு எனது மனமார்ந்த நன்றி. இது எங்களுக்கு மிகப்பெரிய விஷயம். அந்த தலைப்பின் பெருமைக்கு நியாயம் செய்யும் படமாக இதை உருவாக்குவோம் என்று நம்புகிறோம்" என்று உருக்கமாக பதிவிட்டுள்ளார்.

வாழ்த்து: இந்த பதிவு வெளியான சில நிமிடங்களிலேயே ரசிகர்கள் வாழ்த்துகளை குவித்து வருகின்றனர். குறிப்பாக, கமல்ஹாசன் படத்தின் தலைப்பை மீண்டும் பயன்படுத்த அனுமதி அளித்திருப்பது கவினுக்கு கிடைத்துள்ள மிகப்பெரிய அங்கீகாரம் என்று பலரும் கருத்து தெரிவித்து வருகின்றனர். அதேநேரத்தில், ஹாய் படத்தைத் தொடர்ந்து பேர் சொல்லும் பிள்ளை மூலமும் கவின் மற்றொரு வெற்றியைப் பதிவு செய்வாரா என்ற எதிர்பார்ப்பும் ரசிகர்கள் மத்தியில் அதிகரித்துள்ளது.