கோச்சடையான் பாடல் வெளியீடு... இன்னும் உறுதிப்படுத்தாத தயாரிப்பாளர்கள்!

ரஜினியின் கோச்சடையான் பட வெளியீட்டை உறுதியாக அறிவித்த தயாரிப்பாளர்கள், பாடல் வெளியீட்டு விழா எப்போது என்பதை மட்டும் இன்னும் தெளிவாக அறிவிக்கவில்லை.

இவ்விழாவை பிப்ரவரி இறுதியில் பிரமாண்டமாக நடத்த திட்டமிட்டனர். இதற்கான ஏற்பாடுகளும் நடந்து வந்தன. இப்போது பாடல் வெளியீடு குறித்து உறுதியான தேதியை அறிவிக்காமல் மவுனம் காக்கின்றனர்.

கடந்த மாதமே பாடல்களை விழா நடத்தி வெளியிடப் போவதாகக் கூறி வந்தவர்கள், எதற்காக இப்படி ஜவ்வாக இழுக்கிறார்கள் என ரசிகர்கள் சலிப்புடன் கேட்க ஆரம்பித்துள்ளனர்.

'கோச்சடையான்' படம் ஏப்ரல் 11- ந்தேதி உலகம் முழுவதும் ரிலீசாகும் என அறிவிக்கப்பட்டு உள்ளது. தமிழ், தெலுங்கு, இந்தி உள்பட 10 மொழிகளில் மொத்தம் 6 ஆயிரம் தியேட்டர்களில் திரையிடப்படுகிறது.

ரஜினி இரு வேடங்களில் நடித்துள்ள இந்தப் படத்தில் அவருக்கு ஜோடியாக தீபிகா படுகோன் நடித்துள்ளார். ஏ ஆர் ரஹ்மான் இசையமைத்துள்ளார். ஒரு பாடலை ரஜினியே தமிழ், இந்தியில் பாடியுள்ளார்.