எய்ட்ஸ் விழிப்புணர்வு அனிமேஷன் படத்தில் சூர்யா, அனுஷ்கா, ஸ்ருதி ஹாஸன்!

சூர்யா

இந்த அனிமேஷன் காட்சிகளில் நடிகர்கள் சூர்யா, சித்தார்த், நடிகைகள் அனுஷ்கா, ஸ்ருதிஹாசன் ஆகியோர் நடித்திருக்கிறார்கள். இந்த தமிழ் அனிமேஷன் படத்தை இணையம் வைத்திருக்கிறவர்கள் பதிவிறக்கம் செய்து கொள்ளலாம். தமிழகம் முழுவதும் இதை சிடி வடிவில் இலவசமாக வழங்கும் பணியை தமிழக அரசின் எயிட்ஸ் கட்டுப்பாட்டு சொசைட்டி செய்து வருகிறது.

அனுஷ்கா

இந்த அனிமேஷன் படத்தில் இடம்பெற்றது குறித்து நடிகை அனுஷ்கா கூறுகையில், ‘எயிட்ஸ் பாதிப்புகள் குறித்த விழிப்புணர்வு இதுபோன்ற பரவலான கல்வி திட்டங்கள், குறும்படங்கள் மூலம்தான் மக்களிடையே எடுத்து செல்ல முடியும். அதிலும் டீச் எயிட்ஸ் அமைப்பு உருவாக்கியுள்ள தமிழ் அனிமேஷன் படத்தில் உள்ள காட்சிகள் 2 வயது குழந்தை முதல் 60 வயது பெரியவர் வரை சுலபத்தில் புரிந்து கொள்ளும் விதமாக உள்ளது. இளம் வயதினரை கவரும் விதமாக அறிவியலும், பொழுதுபோக்கும் கலந்து உருவாக்கப்பட்டுள்ளது," என்றார்.

சித்தார்த்

நடிகர் சித்தார்த் கூறும்போது, ‘டீச் எயிட்ஸ் உருவாக்கியுள்ள இந்த அனிமேஷன் காட்சியில் நானும் இடம் பெற்றிருப்பது மிகுந்த மகிழ்ச்சி அளிக்கிறது. என் நடிப்பு வாழ்க்கையில் இந்த விழிப்புணர்வு அனிமேஷன் காட்சிகளில் நானும் இடம் பெற்றிருப்பது சந்தோஷமே. இதை பார்க்கிறவர்களுக்கு ஏராளமான கேள்விகள் தோன்றும். பார்த்து முடிந்ததும் அந்த கேள்விகளுக்கு பதிலும் கிடைத்துவிடும்," என்றார்.

ஸ்ருதிஹாஸன்

நடிகை ஸ்ருதிஹாசன் கூறும்போது, "மிக முக்கியமான விழிப்புணர்வு அனிமேஷன் காட்சிகளில் நானும் இடம்பெற்றிருப்பது மிகுந்த மகிழ்ச்சியை தருகிறது," என்றார்.

2011-ம் ஆண்டில் டீச் எயிட்ஸ் அமைப்பு இதேபோன்ற அனிமேஷன் படத்தை தெலுங்கு மற்றும் ஆங்கிலத்தில் வெளியிட்டது. அதில் நாகர்ஜூனா, ஷாபனா ஆஸ்மி, அனுஷ்கா, ஸ்ருதிஹாசன் உட்பட பலர் நடித்திருந்தார்கள்.

தேசிய அளவில்

தேசிய அளவிலும் சர்வதேச அளவிலும் பல்வேறு அமைப்புகள் இவர்களுடன் இந்த விழிப்புணர்வு நிகழ்வுகளில் பங்கெடுத்து வருகிறார்கள். ஸ்டன்போர்டு பல்கலைக்கழகமும், டீச் எயிட்ஸ் அமைப்பும் செயல்படுத்தும் இந்த விழிப்புணர்வு நிகழ்வுகளுக்கு யூனிசெப், கூக்லி, டிலைட், டாடா ஸ்டீல், சிக்னா மற்றும் யாஹூ நிறுவனங்களும் கைகோர்த்திருக்கிறார்கள்.