எப்படி இருக்கிறது லிங்கா...? ஒரு விமர்சன ட்ரைலர்!!

சென்னை: டபுள் கொண்டாட்டத்தில் ரஜினி ரசிகர்கள்.. நேற்று இரவு முதல் ரஜினியின் பிறந்த நாளையும், அவரது லிங்கா பட வெளியீட்டையும் திருவிழா போல கொண்டாடி வருகிறார்கள் ரசிகர்கள். லிங்கா படம் ரசிகர்களை முழு அளவில் திருப்திப்படுத்தியுள்ளதாகவே தெரிகிறது... அவர்கள் பேசுவதைப் பார்த்தால்.

எந்திரனுக்கு பிறகு வந்துள்ள முதல் முழுமையான ரஜினி படம் என்பதால் ரஜினி ரசிகர்கள் பெரும் உற்சாகத்தில் மூழ்கியுள்ளனர். அதிலும் கிட்டத்தட்ட 4 ஆண்டு இடைவெளிக்குப் பின்னர் வந்துள்ள லிங்கா, ரசிகர்களை குஷிப்படுத்தி விட்டது.

சரி படம் எப்படி இருக்கிறது....!

ராக்லைன் வெங்கடேஷ் தயாரிக்க, கே.எஸ். ரவிக்குமார் இயக்க, ஏ.ஆர். ரஹ்மான் இசையமைக்க, சோனாக்ஷி சின்ஹா, அனுஷ்கா ஷெட்டி என இரு நாயகிகளுடன் ரஜினிகாந்த் நடித்துள்ள படம் லிங்கா. தமிழ், தெலுங்கில் திரைக்கு வந்துள்ளது.

லிங்கா ஒரு, ஆக்ஷன் திரில்லர் - வரலாற்றுப் பின்னணியுடன் கூடிய கதை.

நடிப்பு எப்படி?

ரஜினி அசத்தியுள்ளார். அதே ஸ்டைல், அதே வேகம், அதே பிரமிப்பு.. நடிப்பு, சண்டைக் காட்சி, நடனம்.. என அசத்தியுள்ளார். இந்த மனிதருக்கு திரையில் வயதே ஆகாதா என ஆச்சர்யப்படுத்துகிறார். வருகிற அத்தனைக் காட்சிகளிலும் வசீகரிக்கிறார்.

அனுஷ்கா ஷெட்டியும், சோனாக்ஷியும் கலக்கியுள்ளனர். அதிலும் சோனாக்ஷியின் கவர்ச்சி இல்லாத நடிப்பு பார்க்கவே அழகாக இருக்கிறது. அனுஷ்கா, ரஜினி ஜோடி, இன்னொரு ரஜினி - மீனா என்று கூடச் சொல்லலாம். அத்தனை அம்சமாக அமைந்திருக்கிறது பொருத்தம்.

இரண்டு பீரியட் கதையை கே.எஸ்.ரவிக்குமார் திறமையாக கையாண்டிருக்கிறார். காமெடியில் சந்தானம் கவருகிறார். ரத்னவேலுவின் கேமரா அசத்தியுள்ளது. ஏ.ஆர்.ரஹ்மான் ஆச்சரியப்படுத்துகிறார் - பாடல்களிலும், பின்னணி இசையிலும்.

இன்னும் சில மணி நேரங்களில் நமது விரிவான விமர்சனம்.. காத்திருங்கள்!