மாநகரம் வந்து ரசிகர்களை கைதியாக்குவதில் மாஸ்டர்.. லோகேஷ் கனகராஜின் பிறந்தநாள்.. லியோ அப்டேட்?

ஹேப்பி பர்த்டே மாஸ்டரே

கோயம்பத்தூர் கிணத்துக்கடவில் 1986ம் ஆண்டு பிறந்த லோகேஷ் கனகராஜ் இன்று தமிழ் சினிமாவின் இணையற்ற இளம் இயக்குநர்களில் ஒருவராக ஜொலித்து வருகிறார். மாநகரம் படத்தின் மூலம் இயக்குநராக அறிமுகமான லோகேஷ் கனகராஜ் தனது வித்தியாசமான விசாலமான கழுகு பார்வையால் கார்த்தி, விஜய், கமல்ஹாசன் என முன்னணி நடிகர்களை இயக்கி கோலிவுட்டின் புதிய மாஸ்டராக மாறி உள்ளார். ஹேப்பி பர்த்டே மாஸ்டரே!

ஹிட் மெஷின்

சும்மா இயக்குநராகி ஒரு சில படங்கள் பண்ணிட்டு அப்படியே செட்டில் ஆகிடலாம் என்கிற குறுகிய எண்ணம் எல்லாம் இவருக்கு கிடையவே கிடையாது. அடிச்சா கில்லி போல சொல்லி அடிக்கணும் என ஒரு படத்தை கொடுத்தாலும் அது ஹிட் படமாக வேண்டும் என்கிற பக்கா ஸ்கெட்ச் உடன் படங்களை இயக்கி வரும் ஹிட் மெஷினாக மாறி உள்ளார் லோகேஷ் கனகராஜ். அவர் இயக்கத்தில் வெளியான மாநகரம், கைதி, மாஸ்டர் மற்றும் விக்ரம் என எல்லாமே சூப்பர் ஹிட் முதல் இண்டஸ்ட்ரி ஹிட் வரை அடித்த படங்கள் தான்.

குரு காணிக்கை

சினிமாவை தான் படித்ததே கமல்ஹாசன் சார் படங்களை பார்த்து தான் என தனது படங்களில் தொடர்ந்து உலகநாயகனின் முத்திரைகளை பதித்து வந்த லோகேஷ் கனகராஜ் மாஸ்டர் படத்தைத் தொடர்ந்து அடுத்ததாகவே கமல்ஹாசன் உடன் இணைந்து விக்ரம் படத்தை பண்ணுவார் என அவரே கற்பனையிலும் நினைத்திருக்க மாட்டார். ஆனால், கிடைத்த வாய்ப்பை பயன்படுத்திக் கொண்டு தனது குருவுக்கு பக்கா காணிக்கை கொடுத்துள்ளார்.

பல கோடி சம்பளம்

மாநகரம் மற்றும் கைதி படங்களில் ஒரு கோடி ரூபாய் கூட சம்பளமாக வாங்காத லோகேஷ் கனகராஜ் விக்ரம் படத்துக்காக 12 கோடி ரூபாய் சம்பளம் பெற்றார் என தகவல்கள் வெளியாகின. இந்நிலையில், தற்போது விஜய்யை வைத்து அவர் இயக்கி வரும் லியோ படத்துக்கு அதிகபட்சமாக 25 கோடி ரூபாய் சம்பளம் வாங்கி உள்ளார் எனக் கூறுகின்றனர்.

ரத்னகுமார் வாழ்த்து

மாநகரம் வந்து ரசிகர்களை கைதியாக்குவதில் மாஸ்டர் என லோகேஷ் கனகராஜ் உடன் விமானத்தில் வரும் புகைப்படத்தை ஷேர் செய்து ஆடை பட இயக்குநர் ரத்னகுமார் பிறந்தநாள் வாழ்த்து கூறியுள்ளார். மாஸ்டர், விக்ரம் படங்களை தொடர்ந்து லியோ படத்திலும் தனது நண்பனுக்காக பணியாற்றி வருகிறார் ரத்னகுமார்.

லியோ அப்டேட் இருக்கும்

சும்மாவே லியோ படத்தின் அப்டேட்களை அள்ளி கொடுத்து வரும் தயாரிப்பாளர் லலித், தனது படத்தின் இயக்குநர் லோகேஷ் கனகராஜின் பிறந்தநாள் அதுவுமா சும்மா விட்டுருவாரா என்ன? தளபதி விஜய் உடன் லோகேஷ் கனகராஜ் பிறந்தநாள் கொண்டாடும் வீடியோ அல்லது புகைப்படங்கள் வெளியாகும் என எதிர்பார்க்கப்படுகிறது. கூடிய சீக்கிரமே படப்பிடிப்பை முடித்து விட்டு போஸ்ட் ப்ரொடக்‌ஷன் பணிகளை ஆரம்பிக்க காத்திருக்கிறார் லோகேஷ் கனகராஜ்.