“தளபதி 67“ படத்தில் இணைந்த பிரபலங்கள்...லோகேஷ் கனகராஜ் வைத்த புது ட்விஸ்ட்!

விஜய்யின் பிறந்த நாள்

நடிகர் விஜய்யின் 48வது பிறந்த நாள் நேற்று அவரது ரசிகர்களால் கோலாகலமாக கொண்டாடப்பட்டது. விஜய்க்கு ஒட்டுமொத்த திரையுலகமும் திரண்டு வந்து வாழ்த்து தெரிவித்து இணையத்தையே திக்குமுக்காடவைத்து விட்டது. தளபதியின் பிறந்த நாளை முன்னிட்டு நேற்று முன்தினமே விஜய் நடிக்கும் 66 திரைப்படத்தின் பர்ஸ்ட் லுக் மற்றும் தலைப்பு வெளியானது.

வாரிசு

தமிழ், தெலுங்கு என இருமொழியில் வெளியாக உள்ள இப்படத்திற்கு தமிழில் வாரிசு என்றும் தெலுங்கில் வாரிடு என்றும் பெயர்வைக்கப்பட்டுள்ளது. குடும்ப கதை என்பதால், வாரிசு என்ற டைட்டில் பொருத்தமாக உள்ளதென்று ரசிகர்கள் கூறி வருகின்றனர். விஜய்யின் பிறந்தநாளான நேற்று காலை 11 மணிக்கு வாரிசு திரைப்படத்தின் செகண்ட் லுக் போஸ்டரும், மாலையில் மூன்றாவது போஸ்டரும் வெளியானது. ஒவ்வொரு போஸ்டரிலும் ஒவ்வொரு விதமாக மிரட்டி இருந்தார் விஜய். இந்த போஸ்டர் ரசிகர்களை பெரிதும் கவர்ந்தது.

ஏராளமான நடிகர்கள்

தெலுங்கு சினிமாவில் மோஸ்ட் வான்ட்டடாக இருக்கும் தமன் இந்த படத்திற்கு இசையமைக்கிறார். ராஷ்மிகா மந்தனா நாயகியாக நடிக்கும் இந்தப் படத்தில், சரத்குமார், பிரகாஷ்ராஜ், பிரபு, யோகி பாபு, ஜெயசுதா உள்ளிட்ட நட்சத்திர பட்டாளமே நடிக்கின்றனர். இப்படத்தின் படப்பிடிப்பு ஐதராபாத்தில் நடைபெற்று வருகிறது. இப்படம் பொங்கலுக்கு வெளியாக உள்ளது.

கனவு படம்

விஜய்யின் பிறந்தநாளன்று லோகேஷ் இயக்கும் தளபதி 67 திரைப்படம் குறித்து அப்டேட் வரும் என்று எதிர்பார்த்த நிலையில், அப்படம் குறித்த எந்த அப்டேட்டும் வெளியாகவில்லை. ஆனால், தற்போது, இப்படத்தின் கதையை லோகேஷ் கனகராஜ் பல வருடங்களுக்கு முன்பே எழுதியதாகவும், இது அவரின் கனவு படம் என்றும், ஆனால், தற்போது கதையை மாற்றி எழுதிவருவதாகவும் கூறப்படுகிறது.

அக்டோபரில் படப்பிடிப்பு

இப்படம் லோகேஷ் கனகராஜின் யுனிவர்ஸ் படமாகவும் இல்லாமல் தனித்துவமான படமாக இருக்கும் என சொல்லப்படுகிறது. அக்டோபர் மாதம் 2 ம் தேதி படத்தின் ஷுட்டிங் துவங்கப்பட உள்ளதாக கூறப்பட்டு வருகிறது. தளபதி 67 படத்தில் நரேன், அர்ஜுன் தாஸ் ஆகியோர் இணைந்திருப்பதாக கூறப்படுவதால், விக்ரம் படத்தில் பயன்படுத்திய LCU டெக்னிக்கை இப்படத்திலும் பயன்படுத்துவாரா என ரசிகர்கள் ஆர்வமாக கேட்டு வருகின்றனர்.