பெங்களூர் பெண் மிரட்டல் எதிரொலி: பலத்த பாதுகாப்புடன் நடந்த மீரா ஜாஸ்மின் திருமணம்

பதிவுத் திருமணம்...

கடந்த 9ம் தேதி மீராஜாஸ்மின் - அனில்ஜான் இருவருக்கும் பதிவு திருமணம் நடந்தது. பதிவு திருமணம் எர்ணாகுளம் சிலவனூரில் நடைபெற்றது. இதற்காக எர்ணாகுளம் சார்பதிவாளர் அனில் அவரது வீட்டுக்கே சென்று திருமணத்தை சட்டப்படி பதிவு செய்தார்.நிகழ்ச்சியில் இரு வீட்டைச் சேர்ந்த நெருங்கிய உறவினர்கள் மட்டும் கலந்து கொண்டனர்.

திருமணம் முடிந்தது...

அதன் தொடர்ச்சியாக, மீராஜாஸ்மின்-அனில்ஜான் டைட்டஸ் திருமணம், இன்று திருவனந்தபுரத்தில் உள்ள எல்.எம்.எஸ். கிறிஸ்தவ தேவாலயத்தில் காலை 11 மணிக்கு பலத்த போலீஸ் பாதுகாப்புடன் நடைபெற்றது.

பெங்களூர் பெண்...

இதற்கிடையே, மணமகன் அனில்ஜானுக்கு பெங்களூர் பெண் ஒருவர் போனில் மிரட்டல் விடுத்து வந்தார். அதனைத் தொடர்ந்து அனில்ஜான் நேற்று கேரள உயர்நீதி மன்றத்தில் ஒரு மனுதாக்கல் செய்தார்.

போனில் மிரட்டல்...

அதில் எனக்கும் நடிகை மீரா ஜாஸ்மினுக்கும் பிப்ரவரி 12ம் தேதி சர்ச்சில் திருமணம் நடக்கிறது எனது மனைவி என கூறி பெங்களூரை சேர்ந்த ஒரு பெண் எனக்கு மிரட்டல் விடுக்கிறார். திருமணம் நடைபெறும் இடத்துக்கே வந்து தகராறு செய்வேன் என கூறுகிறார். எனவே எனது திருமணத்துக்கு போலீஸ் பாதுகாப்பு அளிக்க வேண்டும் என்று குறிப்பிட்டு இருந்தார்.

பலத்த பாதுகாப்பு....

அனில் ஜானின் மனுவை விசாரித்த நீதிபதி, அவர்களது திருமணத்துக்கு தக்க பாதுகாப்பு அளிக்கும் படி, போலீசுக்கு உத்தரவிட்டார். அதனைத் தொடர்ந்து இன்று நடைபெற்ற மீரா ஜாஸ்மின் -அனில் ஜான் திருமணம் நடைபெற்ற ஆலயத்தின் உள்ளேயும் வெளியேயும் போலீசார் பாதுகாப்பு பணியில் ஈடுபட்டனர்.