தவறான தகவலைச் சொன்ன அமைச்சர் ஆதவ்.. CM விஜய்க்கே முன்னோடி ஒருத்தர் இருக்காரு.. விளாசும் நெட்டிசன்ஸ்

சென்னை: சென்னை: தமிழ்நாட்டில் போதைப்பொருள் ஒழிப்பை வலியுறுத்தும் வகையில் நடைபெற்ற மாரத்தான் ஓட்டத்தில் முதலமைச்சர் விஜய் நேரடியாக 3 கிலோ மீட்டர் ஓடி பங்கேற்றது பெரிய அளவில் கவனத்தை ஈர்த்தது. இதையடுத்து, இந்தியாவிலேயே ஒரு மாரத்தானை தொடங்கி வைத்து, அதில் 3 கிலோ மீட்டர் ஓடிய முதல் முதலமைச்சர் விஜய்தான் என்று விளையாட்டுத்துறை அமைச்சர் ஆதவ் அர்ஜுனா தெரிவித்திருந்தார். ஆனால், அவரது இந்தக் கருத்து தற்போது சமூக வலைதளங்களில் கடுமையான விவாதத்தை கிளப்பியுள்ளது.

அதாவது, போதைப்பொருள் ஒழிப்பை வலியுறுத்தும் வகையில் நடைபெற்ற இந்த மாரத்தானில் ஆயிரக்கணக்கானோர் கலந்து கொண்டனர். நிகழ்ச்சியை தொடங்கி வைத்த முதலமைச்சர் விஜய், வெறும் கொடியசைத்து நிற்காமல், தானும் நேரடியாக 3 கிலோ மீட்டர் தூரம் ஓடி அனைவருக்கும் முன்னுதாரணமாக இருந்தார். இதற்கு பல்வேறு தரப்பினரும் பாராட்டு தெரிவித்து வருகின்றனர்.

இப்படி இருக்கையில், இந்த நிகழ்ச்சி குறித்து பேசிய விளையாட்டுத்துறை அமைச்சர் ஆதவ் அர்ஜுனா, "இந்தியாவிலேயே ஒரு மாரத்தானை தொடங்கி வைத்ததோடு, அதில் 3 கிலோ மீட்டர் ஓடிய ஒரே முதலமைச்சர் தமிழ்நாட்டின் முதலமைச்சர் விஜய்தான்" என்று தெரிவித்தார். அவரது இந்தப் பேச்சு சமூக வலைதளங்களில் வேகமாக பரவியது.

விஜய்க்கே முன்னோடி: இந்நிலையில், இணையவாசிகள் பலரும் அமைச்சரின் இந்தக் கருத்துக்கு எதிராக பழைய தகவல்களை பகிர்ந்து வருகின்றனர். குறிப்பாக, ஜம்மு-காஷ்மீரின் முன்னாள் முதலமைச்சர் ஓமர் அப்துல்லா, கடந்த காலத்தில் நடைபெற்ற 21 கிலோ மீட்டர் ஹாஃப் மாரத்தானில் நேரடியாக பங்கேற்று ஓடி முடித்திருந்த புகைப்படங்கள் மற்றும் செய்திகளை பலரும் பகிர்ந்து, "விஜய் முதல் முதலமைச்சர் அல்ல" என்று சுட்டிக்காட்டி வருகின்றனர்.

அதுமட்டுமல்லாமல், "விஜய் மாரத்தானில் ஓடியது பாராட்டுக்குரிய விஷயம். ஆனால் அதற்காக தேவையில்லாமல் தவறான தகவல்களை கூற வேண்டுமா?", "உண்மையை விட மிகைப்படுத்தி பேசுவதால் தான் பின்னர் தேவையில்லாத விமர்சனங்கள் வருகிறது", "முதலமைச்சரின் செயலுக்கு கிடைக்கும் பாராட்டை கூட இதுபோன்ற தவறான தகவல்கள் திசைதிருப்புகின்றன" என்றெல்லாம் சமூக வலைதளங்களில் பதிவுகள் வெளியாகி வருகின்றன.

சர்ச்சை: மற்றொருபுறம், தவெக ஆதரவாளர்கள் சிலர், அமைச்சர் கூறியதன் நோக்கம் விஜயின் உடற்தகுதி மற்றும் பங்கேற்பை பாராட்டுவதே தவிர, வரலாற்றை மாற்றி கூறுவது அல்ல என்றும் விளக்கம் அளித்து வருகின்றனர். இருந்தாலும், ஓமர் அப்துல்லா 21 கிலோ மீட்டர் ஹாஃப் மாரத்தானில் பங்கேற்ற தகவலை பலரும் ஆதாரங்களுடன் பகிர்ந்து வருவதால், இந்த விவாதம் தொடர்ந்து இணையத்தில் பேசுபொருளாகியுள்ளது.

முதலமைச்சர் விஜய் மாரத்தானில் ஓடி பங்கேற்றது பாராட்டுகளை பெற்றுக் கொண்டிருக்கும் நிலையில், விளையாட்டுத்துறை அமைச்சர் ஆதவ் அர்ஜுனா கூறிய "இந்தியாவிலேயே முதல் முதலமைச்சர்" என்ற கருத்துதான் தற்போது புதிய சர்ச்சையை உருவாக்கியுள்ளது. இதனால், "பாராட்ட வேண்டிய இடத்தில் தவறான தகவலை கூறி தேவையில்லாத விவாதத்தை ஏன் உருவாக்க வேண்டும்?" என்று நெட்டிசன்கள் அமைச்சரை கடுமையாக விமர்சித்து வருகின்றனர்.