கையில் சுத்தியல்..கொலைவெறியுடன் அலையும் விஷ்ணு விஷால்.. மோகன்தாஸ் க்ளிம்ப்ஸ் வீடியோ!

எப்.ஐ.ஆர்

இயக்குநர் மனு ஆனந்த் இயக்கத்தில் நடிகர் விஷ்ணு விஷால் நடித்து சமீபத்தில் வெளியான 'எப்.ஐ.ஆர்' திரைப்படம் ரசிகர்களிடையே நல்ல வரவேற்பை பெற்றது. போலீசாரால் மிகவும் தேடப்படும் குற்றவாளியாக அபு பக்கர் அப்துல்லா என்ற முஸ்லிம் இளைஞராக விஷ்ணு விஷால் நடித்திருந்தார். ஒரு வித்தியாசமான கதைக்களத்தைக் கொண்ட இத்திரைப்படத்தில் கவுதம் மேனன், கௌரவ் நாராயணன், மஞ்சிமா மோகன், ரைசா வில்சன்,ரெபா மோனிகா ஜான் ஆகியோர் முக்கிய வேடங்களில் நடித்திருந்தனர்.

மோகன் தாஸ்

'எப்.ஐ.ஆர்' திரைப்படத்தை அடுத்து, நடிகர் விஷ்ணு விஷால் ஸ்டுடியோஸ் நிறுவனம் சார்பில் தயாராகி வரும் திரைப்படம் மோகன் தாஸ். களவு என்ற படத்தைத் தொடர்ந்து இயக்குநர் முரளி கார்த்திக் இயக்கத்தில் மோகன்தாஸ் திரைப்படம் உருவாகியுள்ளது. இந்த படத்தில் நடிகர் விஷ்ணு விஷால் நாயகனாக நடிக்கிறார். இவருடன் நடிகை ஐஸ்வர்யா ராஜேஷ், இந்திரஜித் சுகுமாரன், ஷாரீக் ஹாஸன், லல்லு, பிரகாஷ் ராகவன், பூர்ணிமா பாக்கியராஜ் உள்ளிட்ட பலர் நடித்திருக்கிறார்கள்.

ஆக்சன் திரில்லர்

ஆக்சன் திரில்லர் திரைப்படமாக உருவாகியுள்ள மோகன் தாஸ் திரைப்படத்தின் பர்ஸ்ட் லுக் மற்றும் டீசர் சமீபத்தில் வெளியாகி மக்களிடம் நல்ல வரவேற்பை பெற்றது. விக்னேஷ் ராஜகோபாலன் ஒளிப்பதிவு செய்திருக்கும் இந்த படத்திற்கு, கே. எஸ். சுந்தரமூர்த்தி இசையமைக்கிறார். எடிட்டர் கிருபாகரன் படத்தொகுப்பு பணியை கவனிக்கிறார். சென்னை மற்றும் அதன் சுற்றுப்புறத்தில் நடைபெற்றுவந்த இப்படத்தின் படப்பிடிப்பு அண்மையில் முழுமையாக நிறைவடைந்தது.

க்ளிம்ப்ஸ் வீடியோ

விஷ்ணு விஷாலின் பிறந்த நாளான இன்று மோகன்தாஸ் திரைப்படத்தின் க்ளிம்ப்ஸ் வீடியோ வெளியாகி உள்ளது. அந்த வீடியோவில், விஷ்ணு விஷால் கையில் ஒரு சுத்தியலை வைத்துக்கொண்டு கொலைவேறியோடு சரமாறியாக யாரோ ஒருவரை தாக்குகிறார். திகிலூட்டும் வகையில் வெளியாகி உள்ள இந்த க்ளிம்ப்ஸ் வீடியோவை பார்ப்பதற்கு மிரட்டலாகவே உள்ளது. தற்போது இந்த க்ளிம்ப்ஸ் இணையத்தில் டிராண்டாகி வருகிறது.