Drishyam 3: ஜார்ஜ் குட்டி மீண்டும் தன்னோட குடும்பத்தை காப்பாத்த வராரு.. த்ரிஷ்யம் 3 ரிலீஸ் தேதி!

திருவனந்தபுரம்: நடிகர் மோகன்லால், இயக்குநர் ஜீத்து ஜோசப் கூட்டணியில் உருவாகும் 'த்ரிஷ்யம் 3' திரைப்படம், ஏப்ரல் 2, 2026 அன்று உலகமெங்கும் வெளியாகும் என அதிகாரபூர்வமாக அறிவிக்கப்பட்டுள்ளது. ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ள இத்திரைப்படத்தின் திரையரங்கு ஒப்பந்தங்கள் மற்றும் காட்சிகளின் அட்டவணை குறித்த தகவல்களைப் படக்குழு தற்போது வெளியிட்டுள்ளது.

விநியோகக் குழுவின் வழிகாட்டுதலின்படி, திரையரங்குகளில் தினமும் நான்கு காட்சிகள் கட்டாயம். கூடுதல் அதிகாலை/இரவு காட்சிகள் திரையரங்கு விருப்பத்தைச் சாரும். ஆரம்பகட்டமாக, ரசிகர் அல்லது சிறப்பு டிரைலர் காட்சிகள் எதுவும் அறிவிக்கப்படவில்லை. வாய்மொழி விளம்பரம் மூலம் திரையரங்கு வருகையை அதிகரிக்க தயாரிப்பாளர்கள் நிதானமான யுக்தியைக் கையாள்கின்றனர். நல்ல விமர்சனங்கள் கிடைத்தால், ஈஸ்டர் மற்றும் விஷு விடுமுறை நாட்களில் படம் அதிக வசூலைக் குவிக்கும் என எதிர்பார்க்கப்படுகிறது.

இயக்குநர் ஜீத்து ஜோசப் இதற்கு முன் இயக்கிய 'வலது வசத்தே கள்ளன்' படத்திற்குக் கலவையான விமர்சனங்கள் கிடைத்த நிலையில், 'த்ரிஷ்யம் 3' மீதான படக்குழுவின் கவனம் அதிகரித்துள்ளது. மோகன்லால் மற்றும் மம்மூட்டி இணைந்து நடிக்கும் 'பேட்ரியாட்' என்ற மற்றொரு பெரும் எதிர்பார்ப்புக்குரிய மலையாளப் படமும் அதே ஏப்ரல் மாதத்திலேயே வெளியாகவுள்ளது.

இக்கதைக்களத்தின் இந்தி ரீமேக்கில் அஜய் தேவ்கன் நடிக்க, அப்படம் அக்டோபர் 2026-ல் வெளியாகிறது; 'த்ரிஷ்யம் 3' அதற்கு ஆறு மாதங்களுக்கு முன்னரே திரைக்கு வருகிறது. சமீபத்தில் ஒரு நிகழ்வில் பேசிய இயக்குநர் ஜீத்து ஜோசப், "த்ரிஷ்யம் படங்களின் வெற்றி ஒரு 'சுமையாக' உள்ளது" எனக் குறிப்பிட்டார். ரசிகர்கள் எந்தவித உயர்ந்த எதிர்பார்ப்புகளும் இல்லாமல் படத்தைப் பார்க்குமாறும் அவர் கேட்டுக் கொண்டார்.

முதல் இரு பாகங்களில் போலீஸ் விசாரணையில் இருந்து தனது குடும்பத்தைப் பாதுகாத்து தந்திரமாகத் தப்பிய ஜார்ஜ் குட்டியின் (மோகன்லால்) கதைதான் இந்தப் படத்தின் முக்கியக் களம். இத்திரைப்படத்தில் 'த்ரிஷ்யம் 3' படப்பிடிப்பு கேரளாவின் தொடுபுழா மற்றும் அதன் சுற்றியுள்ள பகுதிகளில் நடைபெற்றது. மார்ச் மாதம் டாக்ஸிக், துரந்தர் 2 உள்ளிட்ட படங்கள் வெளியாக உள்ள நிலையில், ஏப்ரல் 2ம் தேதி த்ரிஷ்யம் 3 மீண்டும் ரசிகர்களை திரையரங்குகள் நோக்கி நகர்த்தும் என எதிர்பார்க்கப்படுகிறது.

மோகன்லால், மம்மூட்டி, பகத் ஃபாசில், நயன்தாரா நடிப்பில் உருவாகியுள்ள பேட்ரியாட் திரைப்படம் ஏப்ரல் 23ம் தேதி வெளியாகவுள்ள நிலையில், இரண்டு படங்களுக்கான வசூல் எப்படி இருக்கும் என்கிற கேள்வியும் எழுந்துள்ளது.