திருவண்ணாமலை ரமண மகரிஷி ஆசிரமத்தில் சுதந்திர தினக் கொண்டாட்டம்.. தேசிய கொடியேற்றி இளையராஜா மரியாதை!

76வது சுதந்திர தினம்

இன்றைய தினம் 76வது சுதந்திர தினக் கொண்டாட்டங்களில் நாடு ஈடுபட்டுள்ளது. சுதந்திரம் அடைந்து 75 ஆண்டுகளை நாம் கடந்துள்ளோம். நாம் எளிமையாக அனுபவித்துவரும் இந்த சுதந்திரத்திற்காக நமது முன்னோர்கள் கொடுத்த விலை கொஞ்ச நஞ்சமில்லை. பலரது கல்லறையில்தான் இந்த சுதந்திரம் நமக்கு உரியதாக மாறியுள்ளது.

சுதந்திர தாகம்

அடிமைத்தனமான வாழ்க்கையில் நம்முடைய நாட்டின் வளங்கள் கைமாறின. அதையெல்லாம் கண்ணீருடன் பார்ப்பதை தவிர வேறு எதுவும் செய்ய முடியாமல் தவித்தன பல உள்ளங்கள். அதன் வெளிப்பாடே சுதந்திர தாகமாக வெளிப்பட்டது. என்று தணியும் இந்த சுதந்திர தாகம் என்று கவிஞர் பாரதியாரையும் பாட வைத்தது.

தலைவர்கள் வாழ்த்து

இன்றைய தினம் 76வது சுதந்திர தினத்தை நாம் கொண்டாடி வரும் நிலையில் ஏராளமான அரசியல் தலைவர்கள் பலரும் தங்களது வாழ்த்துக்களை பகிர்ந்துள்ளனர். திரையுலக பிரபலங்களும் தங்களது வாழ்த்துக்களை நாட்டு மக்களுக்கு பகிர்ந்துள்ளனர். நடிகர் ரஜினிகாந்த்தும் தன்னுடைய வாழ்த்துக்களை பகிர்ந்துள்ளார்.

வீடுகளில் தேசியக் கொடி

முன்னதாக பிரதமரின் கோரிக்கையை ஏற்று பல பிரபலங்களும் தங்களது வீடுகளில் தேசியக் கொடியேற்றும் இயக்கத்தில் கலந்து கொண்டனர். ரஜினிகாந்த், மறைந்த நடிகர் சிவாஜி உள்ளிட்டவர்களின் வீடுகளில் தேசிய கொடி கடந்த இரு தினங்களாக பறந்து வருகின்றன.

தேசிய கொடியேற்றி இளையராஜா மரியாதை

இந்நிலையில் திருவண்ணாமலைக்கு சென்ற பிரபல இசையமைப்பாளர் இசைஞானி இளையராஜா அங்கு ரமண மகரிஷி ஆசிரமத்தில் தேசிய கொடியை ஏற்றி மரியாதை செய்துள்ளார். இதன் புகைப்படங்கள் சமூக வலைதளங்களில் பகிரப்பட்டு ரசிகர்களை வெகுவாக கவர்ந்துள்ளது.

ரமணர் ஆசிரமத்தில் இளையராஜா

ஆன்மிகத்தில் மிகுந்த ஈடுபாடு கொண்டவர் இளையராஜா. இவர் அடிக்கடி திருவண்ணாமலைக்கும் மலையடிவாரத்தில் உள்ள ரமண மகரிஷி ஆசிரமத்திற்கும் செல்வதை வழக்கமாக கொண்டவர். இந்நிலையில் தற்போது இவர் தேசியக் கொடியை ஏற்றி மரியாதை செய்துள்ளார்.

ராஜ்யசபா எம்பி இளையராஜா

இளையராஜா இசையில் 1400க்கும் மேற்பட்ட படங்கள் வெளியாகியுள்ளன. இவற்றில் பல படங்கள் வெற்றிப்படங்கள். இவரது இசைக்காகவே படங்கள் ஓடிய வரலாறும் உள்ளது. இவருக்கு பல அங்கீகாரங்கள் கிடைத்துவரும் நிலையில் சமீபத்தில் ராஜ்யசபா நியமன எம்பியாக நியமிக்கப்பட்டுள்ளார்.