இந்திக்குப் போகும் நான் ஈ!

சென்னை: தமிழ், தெலுங்கில் பெரும் வெற்றிப் பெற்ற நான் ஈ திரைப்படம் அடுத்து இந்தியில் டப்பாகிறது.

மாக்கி என்ற பெயரில் வரும் அக்டோபர் 12-ம் தேதி வெளியாகிறது இந்தப் படம்.

நான் ஈ படத்தில் சுதீப், நானி, சமந்தா உள்ளிட்டோர் நடித்துள்ளனர்.

தான் விரும்பும் பெண்ணின் காதலனை கொன்றுவிடுகிறான் ஒரு பணக்காரன். இறந்த காதலன் ஈயாக வந்து கொலைகாரனை பழிவாங்குவதுதான் கதை.

தெலுங்கில் ஈகா என்ற பெயரில் வெளியான இந்தப் படம் ரூ 80 கோடிக்கும் மேல் வசூல் குவித்துள்ளது.

தமிழில் இன்னும் வெற்றிகரமாக ஓடிக் கொண்டிருக்கிறது 'நான் ஈ '. தமிழில் மட்டும் 25 கோடிக்கும் மேல் ஈட்டியுள்ளது. இந்திக்கேற்ப சில காட்சிகள் கிராபிக்ஸில் மாற்றப்பட்டுள்ளதாகத் தெரிகிறது.