ஆஸ்கர் திரையிடல்.. ஒத்த செருப்பை பாராட்டிய நீத்து சந்திரா!

தனி ஒருவன்

ஒரே ஒரு நடிகர் மட்டுமே நடித்த படங்கள் உலகளவில் சில வந்திருந்தாலும், தமிழ்நாட்டில் பார்த்திபன் நடிப்பில் புதுமுயற்சியாக இந்த ஒத்த செருப்பு சைஸ் 7 திரைப்படம் வித்தியாசம் காட்டியது. தமிழ்நாட்டில் உள்ள விமர்சகர்கள், ரசிகர்கள் என பலரும் ஒத்த செருப்பு படத்தை பாராட்டினாலும், இங்கே அந்த படம் மிகப்பெரிய வசூலை குவிக்கவில்லை.

புதிய பாதை

தனது எழுத்து மற்றும் இயக்கத்தின் மூலம் பல புதிய பாதைகளை நடிகர் பார்த்திபன் உருவாக்கி வருகிறார். அவரது விடா முயற்சியின் பலனாக ஒத்த செருப்பு சைஸ் 7 படம் உலகளவில் பாராட்டுக்களை அள்ளி வருகிறது. ஒரு கொலைக் குற்றவாளியின் வாக்குமூலமாக அவனது பார்வையில் இருந்து மட்டுமே இந்த கதை சொல்லப்பட்டிருந்த விதம், படத்திற்கு பக்க பலமாக அமைந்திருந்தது.

ஆஸ்கர் பட்டியல்

கடந்த செப்டம்பர் 20ம் தேதி வெளியான ஒத்த செருப்பு படம், ஆஸ்கர் விருதுக்கு இந்தியா சார்பில் அனுப்பப்படும் பட்டியலில் இடம்பெற்று இருந்தது. ஆனால், ஒத்த செருப்பு, சூப்பர் டீலக்ஸ், வடசென்னை உள்ளிட்ட படங்களில் ஒன்று கூட இறுதி பரிந்துரை பட்டியலுக்கு செல்லவில்லை. ரன்வீர் கபூர், ஆலியா பட் நடிப்பில் வெளியான கல்லி பாய் படம் மட்டுமே இந்தியாவின் சார்பாக ஆஸ்கர் விருதுக்கு பரிந்துரைக்கப்பட்டு இருக்கிறது.

விடுவதாக இல்லை

ஆஸ்கர் பரிந்துரை பட்டியலில் ஒத்த செருப்பு சைஸ் 7 படத்தை இந்தியா அனுப்பவில்லை என்றாலும், நடிகர் பார்த்திபன் விடுவதாக இல்லை. கோல்டன் குளோப் மற்றும் ஆஸ்கர் குழுவினருக்கு தனது ஒத்த செருப்பு படத்தை பிரத்யேக திரையிடலாக திரையிட்டு பாராட்டுக்களை அள்ளி வருகிறார்.

நீத்து சந்திரா பாராட்டு

விஷாலின் தீராத விளையாட்டு பிள்ளை மற்றும் ஜெயம் ரவியின் ஆதிபகவன் உள்ளிட்ட தமிழ் படங்களில் நடித்துள்ள பாலிவுட் நடிகை நீத்து சந்திரா, ஆஸ்கர் திரையிடலின் போது கலந்து கொண்டிருக்கிறார். படத்தை பார்த்த நீத்து சந்திரா, இந்த படத்தின் வெற்றியை யாராலும் தடுக்க முடியாது. கண்டிப்பாக பார்க்க வேண்டிய படம் என தனது ட்விட்டர் பக்கத்தில் நடிகர் பார்த்திபனுடன் இருக்கும் புகைப்படத்துடன் சேர்த்து பதிவிட்டுள்ளார்.