லட்சுமி ராமகிருஷ்ணனின் நெருங்கிவா முத்தமிடாதே!.. அக்.-31ல் ரிலீஸ்!!

நாலு கதை உள்ள படம்

இந்த படத்தை ஒரு குவாலிட்டியான கமர்சியல் படமாக இயக்கியிருக்கிறேன் என்று கூறியுள்ளார் லட்சுமி ராமகிருஷ்ணன். இந்த படத்துல நாலு கதை இருக்கு.. ஒரு க்ரைம், செண்டிமென்ட், காமெடி, சீரியஸ்ன்னு ஒரு கலவையாக இயக்கியிருக்கேன் என்றும் கூறினார்.

லாரியின் வாசகம்

இந்த படத்தின் டைட்டீல் ஒரு மாதிரி ரொமான்ஸாத்தான் தெரியும். ஆனா லாரியை மையமாகக் கொண்ட கதைன்றதால சில லாரிகளின் பின்னால் எழுதியிருக்கும் வாசகமான ‘நெருங்கி வா முத்தமிடாதே' என்பதை டைட்டிலா வைத்துள்ளேன் என்றார்.

திருச்சி - காரைக்கால்

நாட்டில் பெட்ரோல் தட்டுப்பாடு ஏற்பட்டு ஒரு நாலு நாளைக்கு பெட்ரோல் பங்க்குகள் மூடப்பட்டால் நாட்டு நிலைமை என்னாகும்..? திருச்சியிலிருந்து காரைக்காலுக்கு போற லாரி, வழக்கமா நாலு மணி நேரத்துக்குள்ள போய்ச் சேரணும்... ஆனா இந்தப் படத்துல அதுக்கு பதினாலு மணி நேரம் ஆகுது. ஏன்...? இதைத்தான் கொஞ்சம் விறுவிறுப்பா சொல்லியிருக்கேன் என்றும் கூறினார்.

லட்சுமியின் ஆதங்கம்

குறைந்த பட்ஜெட்டில் தரமான படம் எடுத்தால் இங்கு மரியாதையே இல்லை.. நிறைய செலவு செய்து மிகப் பெரிய பட்ஜெட்டில் செய்தால்தான் அவரை இயக்குநர்கள் என்கிறார்கள். எனவேதான் இந்தப் படத்தை பெரிய பட்ஜெட்டில் எடுத்துள்ளேன் என்றும் கூறினார்.

65 நாளில் முடித்தேன்

இந்தப் படத்தோட ஷூட்டிங்கை 75 நாள்ல முடிக்கிறேன்னு தயாரிப்பாளிடம் சொல்லியிருந்தேன். ஆனா 65 நாள்லயே முடிச்சிட்டேன்.. லாரி... டிராவல்ன்னு நிறைய இடங்களுக்கு மாற வேண்டியிருந்ததால இத்தனை நாளாயிருச்சு.." என்றார் லட்சுமி ராமகிருஷ்ணன்.

பாடல் வெளியீடு

‘நெருங்கி வா முத்தமிடாதே' திரைப்படத்தில் நான்கு பாடல்கள் இடம்பெற்றுள்ளன. பாடல் வெளியீட்டு விழா சமீபத்தில் தனியார் எப்.எம் ரேடியோ நிலையத்தில் நடைபெற்றது. படப்பிடிப்பு முற்றிலும் முடித்துவிட்ட நிலையில், வரும் 31ஆம்தேதி படத்தை வெளியிட உள்ளதாக தெரிவித்துள்ளார் இயக்குநர் லட்சுமி ராமகிருஷ்ணன்.

பரிசு காத்திருக்கு

முழுக்க முழுக்க விறுவிறுப்பான திரைக்கதையை இந்த படத்தில் உபயோகித்து உள்ளதாகவும், அடுத்து என்ன காட்சி வரும் என்று படம் பார்ப்பவர்கள் ஊகிக்கவே முடியாது என்று தான் சவால் விடுவதாகவும் தனது சவாலை ஏற்று படத்தின் அடுத்த காட்சியை ஊகித்துவிட்டால் அதற்கு ஒரு பெரிய தொகை பரிசு தர தயாராக உள்ளதாகவும் இயக்குநர் லட்சுமி ராமகிருஷ்ணன் கூறியுள்ளார்.​

தைரியமான முடிவுதான்

தீபாவளிக்கு வெளியான கத்தி, பூஜை, ஹேப்பி நியூ இயர் ஆகிய திரைப்படங்கள் தியேட்டர்களில் ஹவுஸ் புல்லாக ஓடிக்கொண்டிருக்கும் நிலையில் வரும் அக்டோபர் 31ஆம் தேதி தனது நெருங்கி வா முத்தமிடாதே' திரைப்படத்தை அவர் ரிலீஸ் செய்ய தைரியமாக முடிவு செய்துள்ளார்.