பிப்ரவரி 23-ம் தேதி சினிமா காட்சிகள் ரத்து!

திரைப்பட தொழிலுக்கு விதிக்கப்பட்டுள்ள சேவை வரியை ரத்து செய்யக் கோரி திரைப்படத் துறையினர் நடத்தும் நாடுதழுவிய போராட்டத்துக்கு ஆதரவாக வரும் பிப்ரவரி 23-ம் தேதி தமிழகம் முழுவதும் திரைப்பட காட்சிகள் ரத்து செய்யப்படுகின்றன.

இதுகுறித்து தமிழ்நாடு திரையரங்க உரிமையாளர்கள் சம்மேளனத்தின் தலைவர் அபிராமி ராமநாதன் விடுத்துள்ள செய்திக் குறிப்பு:

மத்திய அரசு சினிமா மேல் கொண்டு வந்திருக்கும் சேவை வரியை ரத்து செய்யக் கோரி இந்தியா முழுவதும் திரைத்துறையினர் அனைவரும் தயாரிப்புப் பணிகள், படப்பிடிப்பு மற்றும் திரையரங்க காட்சிகளை ரத்து செய்வதாக அறிவித்துள்ளனர்.

இதற்கு ஆதரவாக சென்னை நகரிலுள்ள அனைத்து திரையரங்கங்களும் வருகிற பிப்ரவரி மாதம் 23ஆம் தேதியன்று மூடப்படும். அனைத்து காட்சிகளும் ரத்து செய்யப்படும்.

இவ்வாறு அவர் கூறியுள்ளார்.