தீபாவளி ரேசில் ஒரு ஊர்ல ரெண்டு ராஜா

நேற்று வெளியாகவிருந்த ஒரு ஊர்ல ரெண்டு ராஜா படம் தள்ளிப் போய்விட்டது. காரணம்... மெட்ராஸ், ஜீவா படங்கள்தானாம்.

விமல், ப்ரியா ஆனந்த், சூரி, விசாகா சிங் காம்பினேஷனில் உருவாகியுள்ள படம் ‘ஒரு ஊர்ல ரெண்டு ராஜா'.

'ஜெயம் கொண்டான்', ‘சேட்டை' போன்ற படங்களை இயக்கிய கண்ணன் இந்தப் படத்தை இயக்கி உள்ளார். இமான் இசையமைத்திருக்கிறார். மைக்கேல் ராயப்பன் தயாரித்துள்ளார்.

கிராமத்து பின்னணியில் காதலுடன் நகைச்சுவை கலந்து படம் எடுக்கப்பட்டுள்ள படம் இது.

இப்படம் அக்டோபர் 2 தேதி காந்தி ஜெயந்தியன்று ரிலீஸாகும் என்று அறிவிக்கப்பட்டிருந்தது. ஆனால் இப்போது ரிலீஸ் தேதி தள்ளி வைக்கப்பட்டுள்ளதாக கூறப்படுகிறது. அக்டோபர் 10-ஆம் தேதி அல்லது அக்டோபர் 22-ஆம் தேதி தீபாவளியன்று ரிலீஸ் செய்யும் திட்டமிட்டுள்ளார்களாம்.

ஏன் அப்படி?

கடந்த வெள்ளியன்று வெளியான ‘மெட்ராஸ்', ‘ஜீவா' ஆகிய படங்கள் ரசிகர்கள் மத்தியில் நல்ல வரவேற்பைhd பெற்றிருப்பதாலும், ‘யான்' படம் அதிக அரங்குகளைப் பிடித்திருப்பதாலும்தான் இந்த மாற்றமாம்.

தீபாவளிப் போட்டியில் கத்தி, பூஜை என இரண்டு பெரிய படங்கள் உள்ளது ஞாபகமில்லையா ஒரு ஊர்ல ரெண்டு ராஜா டீமுக்கு?