அப்பாடா.. யு கிடைச்சிடுச்சி!- விஷால் நிம்மதி

சென்னை: ஒருவழியாக விஷாலின் பாண்டிய நாடு படத்துக்கு சென்சாரில் யு சான்றிதழ் கிடைத்துவிட்டது.

நடிகர் விஷால் தயாரித்து, லட்சுமி மேனனுடன் சேர்ந்து நடித்துள்ள படம் 'பாண்டிய நாடு'. ஆதலால் காதல் செய்வீர் படத்துக்குப் பிறகு சுசீந்திரன் இயக்கியுள்ள படம் இது. டி.இமான் இசையமைத்துள்ளார். இப்படம் தீபாவளி ஸ்பெஷலாக ரிலீஸ் ஆகிறது. தியேட்டர்களும் அறிவிக்கப்பட்டுள்ளன.

சில தினங்களுக்கு முன் இப் படத்தைப் பார்த்த தணிக்கை குழுவினர் 'யு/ஏ' சான்றிதழ் வழங்கினர். இதனால் சற்று நெருக்கடியான நிலை ஏற்பட்டது.

எனவே முடிவை மறுபரிசீலனை செய்ய தணிக்கைக் குழுவுக்கு கோரிக்கை வைத்தனர். இதையடுத்து இப்படம் தணிக்கை குழுவினருக்கு மீண்டும் திரையிட்டு காண்பிக்கப்பட்டது.

படத்தை பார்த்த தணிக்கை குழுவினர், படக்குழுவினரின் கோரிக்கையை ஏற்று படத்திற்கு தற்போது 'யு' சான்றிதழ் வழங்கியுள்ளனர். தீபாவளிக்கு அஜீத்தின் 'ஆரம்பம்' படமும், கார்த்தியின் 'ஆல் இன் ஆல் அழகுராஜா' படமும் ரிலீஸ் ஆகிறது.

இந்த இரண்டு படங்களுக்கும் சென்சார் போர்டு 'யு' சான்றிதழ் வழங்கியுள்ளது.