இந்தியா சார்பில் ஆஸ்கருக்கு தேர்வாகாத பார்த்திபன் படம்.. ப்ளூ சட்டை மாறன் மகிழ்ச்சிப்பதிவு!

விமர்சகர் ப்ளூ சட்டை மாறன்

பிரபல விமர்சகரும் ஆன்டி இந்தியன் படத்தின் இயக்குநருமான ப்ளூ சட்டை மாறன் தொடர்ந்து பல நடிகர்களையும் வம்பிழுத்து வருபவர். இந்தப் பட்டியலில் ரஜினி, மணிரத்னம், ஆர்ஜே பாலாஜி, பார்த்திபன் என தொடர்ந்து ஒவ்வொருவராக கலாய்த்து வந்தார். இதனிடையே தற்போது இவரது பட்டியலில் சிம்பு மற்றும் கௌதம் மேனன் சேர்ந்துள்ளனர்.

சிம்பு குறித்த உருவக்கேலி

சமீபத்தில் வெந்து தணிந்தது காடு படம் வெளியான நிலையில், உருவ கேலி குறித்து விமர்சிக்க வேண்டாம் என்று ப்ளூ சட்டை மாறனை குறிப்பிட்டு பேசியிருந்தார் சிம்பு. இதற்கு பதிலளித்த ப்ளூ சட்டை மாறன், அவரது பழைய குத்து படத்தில் அவர் பெண்ணின் உடலை குறிப்பிடும் பாடலில் நடித்துள்ளதை சுட்டிக் காட்டினார்.

கௌதம் மேனனின் சாதீய அடையாளம்

தொடர்ந்து இந்தப் படத்தின் இயக்குநர் கௌதம் மேனனும் அவரை ஏதாவது செய்ய வேண்டும் என்று தனது பேட்டியில் குறிப்பிட்டிருந்தார். இதற்கும் அவரை சாதிய அடையாளத்தை தனது பெயரில் வைத்திருக்கிறார் என்பது உள்ளிட்ட பல கமெண்ட்களால் தாக்கி பேசியுள்ளார்.

பார்த்திபனின் இரவின் நிழல்

கடந்த சில மாதங்களுக்கு முன்பு பார்த்திபனின் இரவின் நிழல் என்ற சிங்கிள் ஷாட் படம் வெளியான நிலையில், அது சிங்கிள் ஷாட்டில் எடுக்கப்பட்ட முதல் படம் இல்லை என்று பார்த்திபனிடம் மல்லுக் கட்டினார் ப்ளூ சட்டை மாறன். இதற்கு பார்த்திபன் மற்றும் அவரது ரசிகர்கள் பதிலடி கொடுத்தனர்.

ஆஸ்கருக்கு தேர்வாகாத பார்த்திபன் படம்

இதனிடையே இன்றைய தினம் 2023ம் ஆண்டிற்கான ஆஸ்கர் பரிந்துரை பட்டியலில் பார்த்திபனின் இரவின் நிழல், ஆர்ஆர்ஆர் என 13 படங்கள் இருந்தன. இந்நிலையில், செல்லோ ஷோ என்ற குஜராத்திப் படம் இந்தியா சார்பில் ஆஸ்கருக்கு பரிந்துரைக்கப்பட்டுள்ளது.

ப்ளூ சட்டை மாறன் மகிழ்ச்சிப்பதிவு

இந்த தகவலை தன்னுடைய ட்விட்டர் பக்கத்தில் பகிர்ந்துள்ள ப்ளூ சட்டை மாறன், பார்த்திபனின் இரவின் நிழல் ஆஸ்கருக்கு இந்தியா சார்பில் பரிந்துரைக்கப்படவில்லை என்பதை சுட்டிக் காட்டியுள்ளார். முன்னதாக பார்த்திபனை வம்பிழுத்து, அதன்மூலம் அவரது ரசிகர்களால் அவரது உருவ பொம்மை எரிக்கப்பட்டு, செருப்பு மாலை போடப்பட்டது.

மீண்டும் பார்த்திபன்

அந்த நிகழ்வுகளை வைத்து, ப்ளூ சட்டை மாறன் கமெண்ட்களும் போஸ்ட் செய்திருந்தார். இந்நிலையில், தற்போது கௌதம் மேனன், சிம்புவை வம்பிழுப்பதை தற்காலிகமாக தள்ளிப் போட்டுள்ள அவர், மீண்டும் பார்த்திபனிடமே வந்துள்ளார். வித்தியாசமான முயற்சியால், ஆஸ்கர் பரிந்துரைப் பட்டியலில் இடம்பெற்ற இரவின் நிழல் தேர்ந்தெடுக்கப்படாததை குறிப்பிட்டு வெந்தப் புண்ணில் வேல் பாய்ச்சியுள்ளார் ப்ளூ சட்டை மாறன்.