அது அருண்மொழி இல்லை.. அருள்மொழி வர்மன்.. பொன்னியின் செல்வன் போஸ்டரிலேயே இவ்ளோ பெரிய ஓட்டையா?

இது பொன்னியின் செல்வன் வாரம்

சோழன் வருகிறான் என இந்த வாரத்தின் துவக்கத்தில் அறிவிப்பு வெளியான நிலையில், தினமும் ஒவ்வொரு போஸ்டர்களாக வெளியாகி ரசிகர்களின் வரவேற்பையும் சில விமர்சனங்களையும் பெற்று வருகின்றன. இத்தனை பெரிய கதையை படமாக எடுக்கும் முயற்சியை எம்.ஜி.ஆர், கமல்ஹாசன் என பலர் முயற்சித்தும் முடியாத நிலையில், தமிழ் சினிமாவின் பெருமையை சொல்லும் படமாக இதை உருவாக்க மணிரத்னம் எடுத்த முயற்சிகளுக்கு ரசிகர்கள் வரவேற்பை கொடுக்க வேண்டும் என்கிற கருத்தும் சமூக வலைதளத்தில் வலுத்து வருகிறது.

ராஜ ராஜ சோழனாக ஜெயம் ரவி

சோழ சாம்ராஜ்யத்தையே தமிழ் நாட்டில் நிலை நாட்டி மிகப்பெரிய ஆட்சியை செய்து உலகமே இன்று வரையிலும் வியந்து பார்க்கும் தஞ்சை பெரிய கோயிலை கட்டிய ராஜ ராஜ சோழனின் கதை தான் இந்த பொன்னியின் செல்வன். அருள் மொழி வர்மன், பொன்னியின் செல்வன், ராஜ ராஜ சோழன் என ஏகப்பட்ட பெயர்களால் இந்த கதையில் அவர் அறியப்படுவார். இந்நிலையில், அவரது அட்டகாசமான போஸ்டர் வெளியாகி உள்ளது.

ஈட்டியுடன் ஜெயம் ரவி

ஆதித்த கரிகாலனாக விக்ரம் குதிரையிலும், வத்தியத்தேவனாக கார்த்தி குதிரையிலும் வந்த நிலையில், அருள்மொழி வர்மனான ஜெயம் ரவி யானையில் அசத்தலாக வருவார் என பார்த்த ரசிகர்களுக்கு, கையில் ஈட்டியுடன் போர்க்களத்தில் இருக்கும் காட்சியை படக்குழு தற்போது அதிகாரப்பூர்வமாக வெளியிட்டுள்ளது. மேலும், இன்று மாலை 6 மணிக்கு பொன்னியின் செல்வன் டீசர் வெளியாகும் என்கிற அறிவிப்பும் அதில் இடம்பெற்றுள்ளது.

அது அருண்மொழி இல்லை

அருள்மொழி வர்மன் என்கிற பெயருக்கு பதிலாக அருண்மொழியாக ஜெயம் ரவி நடிக்கிறார் என தற்போது வெளியாகி உள்ள ஆங்கில போஸ்டரை பார்த்த பொன்னியின் செல்வன் வாசகர்கள் அது அருண்மொழி அல்ல அருள்மொழி என திருத்தம் சொல்லி உள்ளனர். சமீபத்தில் வெளியான ஐஸ்வர்யா ராஜேஷின் தி கிரேட் இந்தியன் கிச்சன் டைட்டில் போஸ்டரிலேயே எழுத்துப் பிழை இருந்தது குறிப்பிடத்தக்கது. டிசைனர்கள் ரெடி செய்யும் போஸ்டரை இயக்குநர் பார்த்து சரி செய்து ஓகே சொன்ன பின்னர் வெளியிட மாட்டார்களா? எப்படி இவ்வளவு பெரிய ஓட்டை இந்த முக்கியமான போஸ்டரில் வந்தது என்றும் கேள்வி எழுப்பி வருகின்றனர். ஆங்கிலத்தின் அருண்மொழி என்று தேடினாலும், அருள்மொழி வர்மன் படங்கள் வருவதால் இந்த குழப்பம் ஏற்பட்டு இருக்கலாம் என்கின்றனர்.