ரசிக மகா ஜனங்களுக்கு ஒரு எச்சரிக்கை... பவர்ஸ்டார் "லத்திகா-2"வை எடுக்கப் போறாராம்...!

| Published: Sunday, October 25, 2015, 10:29 [IST]

சென்னை: தனது அறிமுகப் படமான லத்திகா படத்தின் இரண்டாம் பாகத்தை எடுக்கும் திட்டத்தில் இருக்கிறாராம் பவர்ஸ்டார் சீனிவாசன்.

பேரைக் கேட்டாலே சும்மா அதிருதுல்லா என்பது பவர்ஸ்டாருக்கும் பொருந்தும். அந்தளவிற்கு பவர்ஸ்டாரின் "நடிப்புத் திறமை" சொல்லி மாளாது. தனது வாயை அஷ்டகோணலாக்கி அவர் சிரிக்கும் சிரிப்பிற்கே ரசிகப் பட்டாளம் தனியாக உள்ளது.

மருத்துவராகத் தன் வாழ்க்கையைத் துவங்கிய பவர்ஸ்டார் சீனிவாசன், லத்திகா படம் மூலம் தமிழ் சினிமாவில் நாயகனாக அறிமுகமானார். அடுத்தடுத்து ஹீரோ வேடம் கை கொடுக்காததால் காமெடி நடிகரானார் பவர்ஸ்டார்.

நானும் ஹீரோ தான்...

இவர் தற்போது ‘வாலிப ராஜா', ‘நாரதன்', நானும் ஹீரோதான்', ‘சவுகார்பேட்டை' ஆகிய படங்களில் நடித்து வருகிறார். விரைவில் இப்படங்கள் வெளியாக இருக்கின்றன.

லத்திகா...

இந்நிலையில் தமிழ் சினிமாவைப் பிடித்தாட்டும் இரண்டாம் பாகம் மோகம் இவரையும் விடவில்லை. அதன்படி தனது வெற்றிப்படமான (?) லத்திகாவின் இரண்டாம் பாகத்தை எடுக்க திட்டமிட்டிருக்கிறாராம் பவர்ஸ்டார்.