கமல் ஹாஸனை இயக்குகிறார் பிரபு தேவா!

அடுத்து கமல் ஹாஸனை இயக்கப் போகிறார் பிரபு தேவா என்று தகவல் வெளியாகியுள்ளது.

நடன இயக்குநர், நடிகர், இப்போது இயக்குநர் என பல முகங்கள் கொண்டவர் பிரபு தேவா. தெலுங்கு, தமிழ், இந்தியில் இவர் இயக்கும் படங்களுக்கு பெரும் மார்க்கெட் உள்ளது. இந்தியாவில் அதிக சம்பளம் வாங்கும் இயக்குநர் என்ற சிறப்பைப் பெற்றுள்ளார் பிரபு தேவா.

இப்போது இந்தியில் ஏபிசிடி என்ற படத்தில் நடித்து வருகிறார். தமிழில் அவர் நடித்த களவாடிய பொழுதுகள் வெளிவராமல் உள்ளது.

இப்போது மீண்டும் இந்தியில் படம் இயக்க ஏற்பாடுகள் நடந்து வருகிறது. இந்த நிலையில் அவர் கமல் ஹாஸனை வைத்து அடுத்த படம் இயக்கப் போவதாக செய்திகள் வெளியாகியுள்ளன. இந்தப் படத்தை வாசன் விஷுவல் மீடியா நிறுவனம் தயாரிக்கிறது. நான் கடவுள், பாஸ் என்கிற பாஸ்கரன் படங்களைத் தயாரித்தது இந்த நிறுவனம் என்பது குறிப்பிடத்தக்கது.

கமலும் பிரபு தேவாவும் காதலா காதலா என்ற படத்தில் இணைந்து நடித்தனர். அதன் பிறகு இப்போது மீண்டும் இணையவிருக்கின்றனர்.