எனக்கு திருமண ஆசையே இல்லை.. சினிமா, என் குழந்தைகள்தான் உலகம்!- பிரபு தேவா

நன்றி சந்திப்பு

ஒரு சின்ன இடைவெளிக்குப் பிறகு சென்னை வந்த பிரபு தேவா, செய்தியாளர்களைச் சந்தித்தார். இந்தச் சந்திப்பு குறித்து கேட்டபோது, "நான் தமிழில் இப்போது படங்கள் பண்ணாவிட்டாலும், தொடர்ந்து என்னைப் பற்றி தமிழ்ப் பத்திரிகையாளர்கள் எழுதிக் கொண்டுதான் இருக்கிறார்கள். அவர்களைச் சந்தித்துப் பேச வேண்டும், ஒரு நன்றி சொல்ல வேண்டும் என ஆசைப்பட்டேன். அதற்குத்தான் இந்தச் சந்திப்பு,' என்றார்.

படங்கள்

இப்போது என்னென்ன படங்கள் இயக்குகிறீர்கள்? என்று கேட்டபோது, "இந்தியில் அஜய் தேவ்கானை வைத்து ஆக்ஷன் படம் இயக்குகிறேன். பெயர் ஆக்ஷன் ஜாக்ஸன். அடுத்து அக்ஷய்குமாரை வைத்து படம் எடுக்கிறேன். ஏ.பி.சி.டி. பார்ட்-2 என்ற இந்திப் படத்தில் நடித்துக் கொண்டிருக்கிறேன். தமிழ் படங்களில் நடிக்க ஆர்வம் உள்ளது. நல்ல கதை அமைந்தால் நடிப்பேன்," என்றார்.

தமிழில் எப்போ?

தமிழில் படம் இயக்குவது குறித்து கேட்டதற்கு, "தமிழ்ப்பட உலகை ஒருபோதும் மறக்க மாட்டேன். இங்கிருந்துதானே ஆரம்பமே... ஆனால் எப்போது மீண்டும் தமிழ்ப் படம் இயக்குவேன் என்று சொல்ல முடியாது," என்றார்.

தயாரிப்பு

சொந்தப் பட நிறுவனம் தொடங்கி, திறமையான இயக்குநர்களுக்கு வாய்ப்பு தரும் திட்டம் உள்ளதா? என்றதற்கு, "நிறைய நண்பர்கள் இப்படிக் கேட்டுக் கொண்டுதான் இருக்கிறார்கள். விரைவில் அதற்கான முயற்சிகளை மேற்கொள்வேன்," என்றார்.

ரூ 25 கோடி

ரூ 25 கோடி சம்பளம் வாங்குகிறீர்களாமே? என்ற போது, "கேட்க நல்லா இருந்தாலும், இதெல்லாம் உண்மையில்ல சார். என்னை விட அதிக சம்பளம் வாங்கும் இயக்குநர்கள் இருக்கிறார்கள்.

தமிழ்ப் படங்கள்

தமிழ் படங்களுக்கும் நல்ல மார்க்கெட் உள்ளது. இங்குள்ள கதாநாயகர்களும் கொடிகட்டி பறக்கிறார்கள். இந்திஇயக்குநர்கள் தமிழ்ப் படங்களை ஆர்வமாக கவனிக்கின்றனர்.

கமர்ஷியல்தான்

விருது படங்களை இயக்கும் எண்ணம் இல்லை. எனக்கு அந்த அளவு புத்திசாலித்தனம் இல்லை. கமர்ஷியல் படங்கள் எடுக்கவே விரும்புகிறேன்.

விஜய்

தமிழ் நடிகர்களில் விஜய் சிறப்பாக நடனம் ஆடக் கூடியவர். நேரம் கிடைத்தால் டான்ஸ் மாஸ்டராகவும் பணியாற்றுவேன்.

திருமணம் வேண்டாம்

மீண்டும் திருமணம் செய்து கொள்ளும் எண்ணம் இல்லை. தனியாக வாழ்வது எனக்கு சந்தோஷம்தான். இனி எனக்கு எல்லாமே சினிமாவும் என் குழந்தைகளும்தான். இந்த வாழ்க்கையும் நன்றாகத்தான் இருக்கிறது," என்றார்.