வெயிட்டான நாயகி வேண்டாம்: ஹன்சிகாவை அதிரவைத்த தெலுங்கு இயக்குனர்

ஹைதராபாத்: பிரபாஸ் நடிக்கும் படத்தில் நாயகி வாய்ப்பு கேட்ட ஹன்சிகாவை படத்தின் இயக்குனர் பூரி ஜெகநாத் அதிர்ச்சி அடைய வைத்துள்ளார்.

ஒல்லிக்குச்சியான உடம்பு வைக்க போட்டி போடும் ஹீரோயின்களுக்கு மத்தியில் ஹன்சிகா கொழுக் மொழுக் என்று இருக்கிறார். அவர் அப்படி இருப்பதும் ரசிகர்களுக்கு பிடித்திருக்கிறது. ஹன்சிகாவை தெலுங்கில் அறிமுகப்படுத்தியவர் பிரபல இயக்குனர் பூரி ஜெகநாத். அவர் தற்போது பிரபாஸை வைத்து படம் ஒன்றை எடுக்கிறார்.

இது குறித்து கேள்விப்பட்ட ஹன்சிகா நம்மை அறிமுகப்படுத்தியவர் தானே என்ற உரிமையில் அவரை அணுகி உங்கள் புதுப்படத்தில் என்னை ஹீரோயின் ஆக்குங்களேன் என்று கேட்டுள்ளார். அதற்கு பூரியோ என் படத்திற்கு உன்னைப் போன்று பூசினால் போல் உடம்பு உள்ள ஹீரோயின் ஒத்துவராது என்று தெரிவித்துவிட்டாராம்.

இதைக் கேட்ட ஹன்சியின் முகம் சுருங்கிவிட்டதாம். இவர் என்ன இப்படி சொல்லிவிட்டாரே என்று கவலைப்பட்டாராம் ஹன்சிகா.