திருச்சி கிழக்கு தொகுதி இடைத்தேர்தல்.. களம் இறங்குகிறாரா லாரன்ஸ்? ஜூன் 11-ல் அதிரடி அறிவிப்பு!

சென்னை: தமிழக அரசியல் களம் தற்போது 'திருச்சி கிழக்கு' தொகுதி இடைத்தேர்தலை எதிர்நோக்கி உள்ளது. தமிழக வெற்றிக்கழகம் என்ற கட்சியைத் தொடங்கி, சட்டமன்றத் தேர்தலில் பெரம்பூர் மற்றும் திருச்சி கிழக்கு ஆகிய இரு தொகுதிகளிலும் போட்டியிட்டு மாபெரும் வெற்றி பெற்றார் நடிகர் விஜய். முதலமைச்சராகப் பொறுப்பேற்றதும், விதிமுறைப்படி திருச்சி கிழக்கு தொகுதி சட்டமன்ற உறுப்பினர் பதவியை அவர் ராஜினாமா செய்தார். இதனால் அங்கு இடைதேர்தல் வர இருக்கும் நிலையில், அந்தத் தொகுதியில் நடிகர் ராகவா லாரன்ஸ் போட்டியிடப்போவதாக ஊடகங்களில் செய்திகள் பரவி வருகிறது.

இந்த வதந்திகளுக்கு முற்றுப்புள்ளி வைக்கும் வகையில், ராகவா லாரன்ஸ் தனது எக்ஸ் தள பக்கத்தில் அதிகாரப்பூர்வமாக ஒரு முக்கிய குறிப்பைப் பகிர்ந்துள்ளார். அதில்,இ அனைவருக்கும் வணக்கம், நான் திருச்சி கிழக்குத் தேர்தலில் போட்டியிடுவது குறித்த செய்தி பல்வேறு ஊடகங்களில் பரவி வருகிறது. எனது ஊடக நண்பர்கள் அனைவரும் தொலைபேசியில் என்னைத் தொடர்புகொண்டு, இதுகுறித்து விளக்கம் கேட்டு என்னைச் சந்திக்கக் கோருகின்றனர். இந்த ஊகங்கள் ஒரு கட்டத்தில் பெரிதாகிவிட்டதால், இதற்கு நான் பதிலளிக்க வேண்டும் என்று உணர்கிறேன்.

Photo Credit:

Raghava Lawrence instagram

வாழ்க்கையில் முக்கியமான முடிவு: நான் தற்போது லோகேஷ் கனகராஜ் தயாரிப்பில் உருவாகி வரும் 'பென்ஸ்' (Benz) திரைப்படத்தின் படப்பிடிப்பில் மும்முரமாக இருக்கிறேன். எனது படப்பிடிப்பு வரும் 10ஆம் தேதியுடன் முடிவடைகிறது. என் தாயின் ஆசீர்வாதங்களுடன், என் வாழ்க்கை குறித்த ஒரு முக்கிய முடிவு வரும் 11ஆம் தேதி, வியாழக்கிழமை காலை 9:30 மணிக்கு அறிவிக்கப்படும் என பதிவிட்டுள்ளார். லாரன்சின் இந்த சஸ்பென்ஸ் அறிவிப்பு, அவர் அரசியலில் குதிக்கப் போகிறாரா? அல்லது தவெக கட்சிக்கு ஆதரவாகப் பிரச்சாரம் செய்யப் போகிறாரா? என்ற பலத்த எதிர்பார்ப்பையும், அரசியல் வட்டாரத்தில் பெரும் பரபரப்பையும் ஏற்படுத்தியுள்ளது.

ரியல் ஹீரோ ராகவா லாரன்ஸ்: சினிமாவில் முன்னணி நடன இயக்குநர், வெற்றிகரமான நடிகரான லாரன்ஸ் முனி, காஞ்சனா போன்ற பிளாக்பஸ்டர் படங்களை இயக்கினார். ஆனால், இவற்றைத் தாண்டி எளிய மக்கள் மத்தியில் இவர் ஒரு 'ரியல் ஹீரோ'வாகப் பார்க்கப்படுகிறார். தனது சொந்தச் செலவில் அறக்கட்டளை தொடங்கி, நூற்றுக்கணக்கான மாற்றுத்திறனாளி குழந்தைகளுக்கு நடனப் பயிற்சி அளித்து அவர்களை மேம்படுத்துகிறார். மேலும்,ஏழைக் குழந்தைகளுக்கு இலவச இதய அறுவை சிகிச்சை, கல்வி உதவித்தொகை வழங்குவது எனத் தொடர்ந்து பல நற்பணிகளைச் செய்து வருகிறார். சூப்பர் ஸ்டார் விஜய்யுடன் ஆரம்பக் காலத்திலிருந்தே நல்ல நட்பில் இருக்கும் லாரன்ஸ், விஜய்யின் அரசியல் வருகையைத் தொடர்ந்து பாராட்டி வருகிறார் என்பது குறிப்பிடத்தக்கது.