ஷமிதாப்பில் தனுஷுடன் அமிதாப் மட்டுமல்ல.. ரேகாவும் நடிக்கிறார்!

ஷமிதாப் படத்தில் தனுஷுடன் அமிதாப் நடிப்பதும், அந்த கதை கூட நம்ம ஊரில் 80களில் பிரபலமான நடிகர் மோகன் - அவருக்கு படங்களில் குரல் கொடுத்த சுரேந்தர் இடையிலான சண்டைதான் என்பதும் பலருக்கும் தெரிந்த சமாச்சாரம்தான்.

இப்போது படத்தில் புதிதாக ஒரு பாத்திரம் சேர்க்கப்பட்டுள்ளது. அவர் ரேகா. ஆம், பாலிவுட்டின் முன்னாள் கனவுக் கன்னி் ரேகாதான்.

தனுஷ், ‘ராஞ்சனா' இந்தி படம் மூலம் மும்பை படஉலகில் பிரபலமானார். அப்படம் ஹிட்டானதால் மீண்டும் இந்தியில் நடிக்க அவருக்கு வாய்ப்பு கிட்டியது.

தனுஷும், அமிதாப்பச்சனும் நடித்த காட்சிகள் ஏற்கனவே படமாக்கப்பட்டுவிட்ட நிலையில்தான், ரேகா மேட்டரை வெளியில் விட்டுள்ளார் இயக்குநர் பால்கி.

அமிதாப் - ரேகா இடையிலான உறவும் பிரிவும் இந்தியத் திரையுலகம் அறிந்தது. பாலிவுட்டின் மிக வெற்றிகரமான ஜோடியான அமிதாப் - ரேகா 18 படங்களில் இணைந்து நடித்துள்ளனர். கடைசியாக இருவரும் நடித்த படம் சில்சிலா. வெளியா ஆண்டு 1981.

33 ஆண்டுகளுக்குப் பிறகு இருவரும் ஒரு படத்தில் நடிக்கின்றனர். ஆனால் ஜோடியாக அல்ல!