ஊரே சிரிக்கிது.. ஊரே சிரிக்கிது அப்பப்பா.. ‘வீட்ல விசேஷங்க‘ டிரைலர் ரிலீஸ் !

ஆர்.ஜே.பாலாஜி

வானொலியில் நிகழ்ச்சிகளை தொகுத்து வழங்கியதன் மூலம் பிரபரலமானவர் ஆர்.ஜே.பாலாஜி. இதையடுத்து, பல படங்களில் நகைச்சுவை கதாபாத்திரங்களில் நடித்துள்ளார். மேலும், எல்.கே.ஜி, படம் மூலம் ஹீரோவாக அறிமுகமானார். இதையடுத்து நயன்தாரா நடிப்பில் வெளியான மூக்குத்தி அம்மன் படத்தின் மூலம் இயக்குநர் அவதாரம் எடுத்துள்ளார்.

வீட்ல விசேஷங்க

தற்போது ஆர்.ஜே.பாலாஜி இயக்கத்தில் வீட்ல விசேஷங்க என்கிற படம் தயாராகி உள்ளது. போனி கபூர் தயாரித்துள்ள இப்படத்தில் ஆர்.ஜே.பாலாஜி நடித்தும் இருக்கிறார். இப்படத்தின் படப்பிடிப்பு முடிந்து படம் ரிலீசுக்கு தயாராக உள்ளது. ஜூன் மாதம் 17-ந் தேதி இப்படம் திரையரங்குகளில் ரிலீசாக உள்ளது. இப்படத்தின் ப்ரோமோஷன் வேலைகள் விறுவிறுப்பாக நடந்து வருகின்றன.

டிரைலர்

இந்நிலையில், வீட்ல விசேஷங்க திரைப்படத்தின் டிரைலர் வெளியாகி உள்ளது. ஆர்.ஜே. பாலாஜிக்கே உரிய ஸ்டைலில் கலாட்டாவான காமெடி திரைப்படமாக இப்படம் உருவாகி உள்ளதை இந்த டிரைலரை பார்க்கும் போதே தெரிகிறது. திருமண வயதில் இருமகன் இருக்கும் போது, ஊர்வசி கர்ப்பமாக இருக்கிறார். இதனால், ஆர்.ஜே.பாலாஜியை பார்த்து ஊரே ஒன்று கூடி சிரிக்கிறது. ஒரு வித்தியாசமான காமெடி திரைப்படமாக, இப்படம் இருக்கும் என்று எதிர்பார்க்கப்படுகிறது.

பதாய் ஹோ

2018ம் ஆண்டு வெளியான 'பதாய் ஹோ' திரைப்படத்தின் ரீமேக் தான் வீட்ல விசேஷங்க. இப்படத்தில், ஆயுஷ்மான் குரானா, நீனா குப்தா லீட் ரோலில் நடித்திருந்தார். இத்திரைப்படத்தை அமிர் ரவீந்தரநாத் சர்மா இயக்கி இருந்தார். இத்திரைப்படம் வசூலை வாரிக்குவித்தது மட்டும் இல்லாமல் தேசிய விருதையும் பெற்றது குறிப்பிடத்தக்கது.