ஜீன்ஸ் சர்ச்சை: கே ஜே யேசுதாசுக்கு நடிகர் சலீம் குமார் ஆதரவு

பெண்கள் ஜீன்ஸ் அணியக் கூடாது என்று கூறி சர்ச்சைக்குள்ளான கே ஜே யேசுதாஸுக்கு, பிரபல மலையாள நடிகர் சலீம் குமார் ஆதரவு தெரிவித்துள்ளார்.

பெண்கள் ஜீன்ஸ் அணிந்து ஆண்களுக்கு தொல்லை தரக்கூடாது என்றும் ஜீன்ஸ் அணிவது இந்திய கலாச்சாரத்துக்கு எதிரானது என்றும் ஒரு நிகழ்ச்சியில் குறிப்பிட்டார் ஜேசுதாஸ். இந்த சர்ச்சை பேச்சுக்கு எதிர்ப்புகள் கிளம்பின.

பெண்கள் இயக்கங்கள் யேசுதாசை கண்டித்து போராட்டங்கள் நடத்தின. போலீசிலும் புகார் செய்துள்ளனர். யேசுதாஸ் குடும்ப பெண்கள் ஜீன்ஸ் அணிந்து இருப்பது போல் கம்ப்யூட்டர் கிராபிக்சில் படங்களை உருவாக்கி அவற்றை பேஸ்புக், ட்விட்டரில் பரவ விட்டனர்.

இன்னொரு பக்கம் யேசுதாசின் சர்ச்சை பேச்சுக்கு ஆண்கள் அமைப்பினர் ஆதரவு தெரிவித்தனர். பெண்கள் சங்கங்களைச் சேர்ந்த சில அமைப்பினரும் அவருக்கு எதிராக போராட்டங்கள் நடத்துவதைத் தவிர்த்தனர்.

இந்த நிலையில் பெண்கள் ஜீன்ஸ் அணியக்கூடாது என்று யேசுதாஸ் பேசியதற்கு பிரபல மலையாள நடிகர் சலீம்குமார் ஆதரவு தெரிவித்தார். பொது நிகழ்ச்சியொன்றில் பேசும்போது, 'யேசுதாஸ் சொன்ன கருத்து தவறானது அல்ல. நல்ல விஷயம்தான். அவருக்கு நான் ஆதரவு தெரிவிக்கிறேன்,' என்றார்.