சாம் டி ராஜ்... வெரைட்டி காட்டும் 'வந்தா மல' இசையமைப்பாளர்!

எப்படி இசைத் துறைக்கு வந்தீர்கள்?

நான் திருச்சியில் பிறந்த வளர்ந்தவன். சென்னையில் தாஜ் ஹோட்டலில் தனி 'பேன்ட்' வைத்து வாசித்துக் கொண்டிருந்தேன். பின்னர் துபாய் போய்விட்டேன். அங்கு எலெக்ட்ரானிக் இசைக் கருவிகளுக்கான அரேஞ்சராக சில ஆண்டுகள் பணியாற்றினேன். பின்னர் சென்னை திரும்பிய பிறகு, தனுஷ் 5-ம் வகுப்பு என்ற படத்துக்கு இசையமைக்கும் வாய்ப்பு வந்தது. அந்தப் படம் நன்றாகப் போயிருந்தால், முன்பே பெரிய பிரேக் கிடைத்திருக்கும். கொஞ்சம் லேட்டாக வந்தா மலயில் கிடைத்திருக்கிறது.

வந்தா மல பாடல்கள் குறித்து..

இந்தப் படத்தின் இயக்குநர் ரொம்ப வித்தியாசமாக பாடல்கள் கேட்டார். அதைப் படமாக்கும் விதம் குறித்து அவர் சொன்னபோது, எனக்கும் ரொம்ப ஆர்வமாகிவிட்டது. 5 பாடல்களுமே ஒன்றுக்கொன்று தொடர்பில்லாத ரகத்திலிருக்கும். இவற்றில் உம்மேல லவ்.. பாடல் வெளியானதுமே பெரிய வரவேற்பைப் பெற்றுவிட்டது. அனா ஆவண்ணாவுக்கு தேவா சாரைப் பாட வச்சேன். கானா பாட்டுக்கு அவர்தான் அத்தாரிட்டி. சைபராகலாம், வாயில வட சுடு..-ன்னு இன்னும் ரெண்டு பாடல்கள். தேசம் ஞானம் கல்வி பாடலை பராசக்தி படத்துலருந்து எடுத்து ரீமிக்ஸ் மாதிரி கொடுத்திருக்கிறோம். முகேஷ் இந்தப் பாடலைப் பாடியிருக்கார்.

இசையில் உங்க இன்ஸ்பிரேஷன் யாரு...

நான் இளையராஜா சார், ஏ ஆர் ரஹ்மான் பாடல்களை ரசித்துக் கேட்பவன். ஆனா எனக்கு இன்ஸ்பிரேஷன்னா அது ஹன்ஸ் ஜிம்மர்தான். அவருடைய இசைக் கோர்வைகள் பிரமிக்க வைப்பவை. இசையில் சில சந்தேகங்களை இமெயில் மூலம் அவரிடம் கேட்டிருக்கிறேன்.

மெலடி, குத்து... எதற்கு அதிக முக்கியத்துவம் தருவீர்கள்?

கதைக்கு எது அவசியமோ, இயக்குநருக்கு எது தேவையோ அப்படித் தருவதுதான் முக்கியம்.

இன்றைக்கு நிறைய இசையமைப்பாளர்கள் வருகிறார்கள். ஆனால் அடையாளமில்லாமல் உள்ளனர். இந்த சூழலில் நீங்கள் வந்திருக்கிறீர்கள்...

உண்மைதான். இந்த சூழலைப் புரிந்து, ரசிகர்கள் ரசிக்கும்படியான பாடல்களைத் தருவேன். வந்தா மல பட பாடல்கள் ரசிகர்களைத் திருப்தி செய்திருக்கும் என நம்புகிறேன். வரும் படங்களில் தொடர்ந்து வித்தியாசமான பாடல்களைத் தருவேன்.

வந்தா மல

• Desam Gnanam | Vandha Mala (2015)
• Exclusive - Unnande Kadhalena - Vandha Mala Song
• Vandha Mala - Official Trailer
• Vandha Mala - Official Jukebox | Sam D Raj | Igore