விஸ்வரூபம் எடுக்கும் கதை திருட்டு விவகாரம்... சிக்கலில் 'சர்கார் '...!

வருண் ராஜேந்திரனின் செங்கோல்

வருண் ராஜேந்திரன் என்பவர் தான் எழுதிய 'செங்கோல்' கதையை திருடி தான் சர்கார் படம் எடுத்துள்ளதாக எழுத்தாளர் சங்கத்தில் புகார் அளித்தார். ஆனால் இதனை ஏ.ஆர்.முருகதாஸ் திட்டவட்டமாக மறுத்தார்.

கதை திருட்டு உறுதி

இந்நிலையில் இந்த விவகாரம் குறித்து, எழுத்தாளர் சங்கத் தலைவர் இயக்குனர் கே.பாக்யராஜ் தலைமையிலானக் குழு விரிவான விசாரணை நடத்தியது. இதில் செங்கோல் கதையின் 95 சதவீதம் காட்சிகள் சர்கார் படத்தில் இடம்பெற்றுள்ளது உறுதியாகியுள்ளது தெரியவந்துள்ளது.

கதையின் உரிமை

2007ம் ஆண்டு வருண் ராஜேந்திரன் இந்த கதையை எழுத்தாளர் சங்கத்தில் பதிவு செய்துள்ளார். இதனால் அந்த கதை அவருக்கு தான் உரிமையானது என எழுத்தாளர் சங்கம் முடிவு செய்துள்ளதாக தகவல் வெளியாகியுள்ளது.

சர்காருக்கு சிக்கல்

சர்கார் படம் வெளிவர இன்னும் 10 நாட்களே உள்ள நிலையில், கதை திருடப்பட்டது உறுதியாகியுள்ளதால், சிக்கல் ஏற்பட்டுள்ளது. கத்தி திரைப்படத்திற்கும் அதேபோன்ற குற்றச்சாட்டு ஏ.ஆர்.முருகதாஸ் மீது கூறப்பட்டது. ஆனால் அதை அவர் நீதிமன்றத்தில் பொய் என நிரூபித்தார்.

நீதிமன்றம் செல்ல வாய்ப்பு

இந்நிலையில் சர்கார் படத்திற்கும் இதே போன்ற பிரச்சினை ஏற்பட்டுள்ளதால், இந்த விவகாரமும் நீதிமன்றத்திற்கு செல்லும் வாய்ப்புள்ளதாக திரைத்துறை வட்டாரங்கள் தெரிவிக்கின்றன. ஆனால் ரிலீஸ் தேதி நெருங்கி வருவதால், வேறு வழிகள் என்ன என்பது குறித்தும் படக்குழு ஆலோசித்து வருகிறது.