பாலச்சந்தர், கமலிடம் விருது பெற்ற புது இயக்குநரின் 'சவாரி'

கே பாலச்சந்தர், கமல் ஹாஸன் என்ற பெரிய ஜாம்பவான்களிடம் விருது பெற்ற புதிய இயக்குநர் குகன் சவாரி என்ற பெயரில் இயக்குகிறார்.

டேக் என்டர்டெயின்மென்ட் என்ற நிறுவனம் இந்தப் படத்தைத் தயாரிக்கிறது. அறிமுக நாயகன் பெனிட்டோ, சனம் செட்டி, ‘முண்டாசுப்பட்டி' முனிஷ்காந்த், கார்த்திக் யோகி, கவிதாலயா கிருஷ்ணன் நடிக்கின்றனர்.

‘பரதேசி' புகழ் ஒளிப்பதிவாளர் செழியன் ஒளிப்பதிவு செய்ய, அமரர் கிஷோர் டிஇ படத்தொகுப்பு செய்கிறார். விஷால் சந்திரசேகர் இசையமைக்கிறார்.

படம் குறித்து இயக்குநர் குகன் கூறுகையில், "நாம் அன்றாடம் தெருவிற்கு தெரு, சாலைக்கு சாலை பார்க்கும் ஒரு விஷயத்தை மையமாக வைத்து எடுத்துள்ளோம். க்ரைம் த்ரில்லர் பாணி படங்களில் இதுவரை தொட்டிடாத ஒரு புதிய கதைகளத்தை கொண்டதுதான் ‘சவாரி'.

நாளைய இயக்குனர்-3 நிகழ்ச்சியில் இயக்குனர் சிகரம் பாலசந்தர் சார் மற்றும் கமல் ஹாசன் சார் அவர்களிடம் விருது வாங்கினேன். என் முதல் படத்தை இவர்கள் இருவருக்கும் திரையிட வேண்டும் என்று எண்ணியிருந்தேன், பாலசந்தர் சார் இன்று நம்மிடையே இல்லை எனினும் அவர் எனக்கு அளித்த கௌரவத்தை ‘சவாரி' காப்பாற்றும்" என்றார் நம்பிக்கையுடன்.