உங்க பொண்ணு மட்டும் காவி பிகினி அணியலாமா? காஷ்மீர் ஃபைல்ஸ் இயக்குநரை விளாசும் நெட்டிசன்கள்!

விவேக் அக்னிஹோத்ரி

கடந்த 2005ம் ஆண்டு சாக்லேட் படத்தின் மூலமாக பாலிவுட்டில் இயக்குநராக அறிமுகமானவர் விவேக் ரஞ்சன் அக்னிஹோத்ரி. தொடர்ந்து கோல், ஹேட் ஸ்டோரி, ஸித், புத்தா இன் எ டிராபிக் ஜாம், தி தஷ்கென்ட் ஃபைல்ஸ் படங்களை இயக்கிய விவேக் அக்னிஹோத்ரி இயக்கத்தில் இந்த ஆண்டு வெளியான தி காஷ்மீர் ஃபைல்ஸ் மிகப்பெரிய கவனம் பெற்றது. பாக்ஸ் ஆபிஸிலும் மிகப்பெரிய வசூல் வேட்டையை நடத்தியது.

பிரிவினைவாதத்தை தூண்டுகிறார்

பாஜகவின் நட்பை பாராட்டி வரும் இயக்குநர் விவேக் அக்னிஹோத்ரி இயக்கிய தி காஷ்மீர் ஃபைல்ஸ் படத்துக்கு ஆதரவும் எதிர்ப்பும் அதிகளவில் கிளம்பியது. இந்து மற்றும் முஸ்லிம் மக்களிடையே பெரும் பிரிவினைவாதத்தை அவர் தூண்டுகிறார் என சர்ச்சைகளும் கிளம்பின.

பதான் பாடலுக்கு எதிர்ப்பு

ஷாருக்கான் நடிப்பில் உருவாகி உள்ள பதான் படத்தின் பெஷாராம் ரங் பாடலில் நடிகை தீபிகா படுகோன் ஆரஞ்சு நிற பிகினியில் நடனம் ஆடியதை பார்த்து காவி நிற பிகினியில் ஆபாசமாக நடனமாடுகிறார் என எதிர்ப்பு தெரிவித்த விவேக் அக்னிஹோத்ரி, சிறுமி ஒருவரை வைத்து அதற்கு எதிர்ப்பு தெரிவிக்கும் படியான வீடியோ ஒன்றை போட்டு சர்ச்சையை மேலும், பெரிதாக்கினார்.

உங்க பொண்ணும் தான்

விவேக் அக்னிஹோத்ரி அப்படியொரு வீடியோ போட்ட நிலையில், கடுப்பான ஷாருக்கான் ரசிகர்கள் விவேக் அக்னிஹோத்ரியின் மகள் மல்லிகாவின் இன்ஸ்டாகிராம் பக்கத்தில் இருந்த ஆரஞ்சு நிற பிகினி போட்டோவை எடுத்துப் போட்டு உங்க பொண்ணும் தான் காவி பிகினி அணிந்துள்ளார் என பதிலடி கொடுத்து வருகின்றனர். உடனடியாக தனது அக்கவுண்டையே பிரைவேட்டாக மாற்றிவிட்டார் விவேக் அக்னிஹோத்ரியின் மகள் மல்லிகா.

நீங்க எடுத்ததெல்லாம் காவியங்கள்

மேலும், கடந்த 2012ம் ஆண்டு விவேக் அக்னிஹோத்ரி இயக்கிய எரோட்டிக் த்ரில்லர் படமான ஹேட் ஸ்டோரி மற்றும் 2014ல் அவர் இயக்கத்தில் வெளியான Zid உள்ளிட்ட படங்கள் படு ஆபாசமாக உள்ளதே, நீங்க எடுத்ததெல்லாம் என்ன காவியங்களா என விவேக் அக்னிஹோத்ரியை வெளுத்து வாங்கி வருகின்றனர். மேலாடை கூட அணியாமல் நடிகைகள் அந்த படங்களில் அரை நிர்வாணமாக நடித்துள்ளது குறிப்பிடத்தக்கது.

வாக்கு வாதம்

விவேக் அக்னிஹோத்ரியின் மகள் பற்றியும் அவர் இயக்கிய பழைய படங்கள் பற்றியும் ஷாருக்கான் ரசிகர்கள் அக்குவேர் ஆணிவேராக எடுத்துப் போட்டு வறுத்தெடுத்தும் வரும் நிலையில், அவர்களுடன் கடும் வாக்குவாதத்தில் தி காஷ்மீர் ஃபைல்ஸ் இயக்குநர் விவேக் ரஞ்சன் அக்னிஹோத்ரி ஈடுபட்டு வருகிறார். அடுத்து அவர் இயக்கத்தில் தி வாசின் வார் மற்றும் டெல்லி ஃபைல்ஸ் திரைப்படங்கள் உருவாகி வருகின்றன.