முகப்பு

செய்திகள்

சென்னை : விண்ணை தாண்டி வருவாயா, செக்க சிவந்த வானம், அச்சம் என்பது மடையடா படங்களைத் தொடர்ந்து டைரக்டர் கெளதம் மேனன் இயக்கத்தில் சிம்பு தற்போது நான்காவது முறையாக இணைந்துள்ள படம் வெந்து தணிந்தது காடு.

ஏ.ஆர்.ரஹ்மான் இசையமைத்துள்ள இந்த படத்தை ஐசரி கணேசனின் வேல்ஸ் இன்டர்நேஷனல் நிறுவனம் தயாரித்துள்ளது. சிம்பு, சித்தி இத்னானி, ராதிகா ரத்குமார், சித்திக், நீரஜ் மாதவ் உள்ளிட்டோர் நடித்துள்ள நடத்துள்ள படம்.

செப்டம்பர் 15 ம் தேதி வெந்து தணிந்தது காடு படத்தை ரிலீஸ் செய்ய உள்ளதாக ஏற்கனவே அறிவித்துள்ளனர். இதற்கான ஏற்பாடுகள் விறுவிறுப்பாக நடந்து வருகிறது. இந்த படத்தின் தமிழ் வெளியீட்டு உரிமத்தை உதயநிதி ஸ்டாலினின் ரெட் ஜெயண்ட் மூவிஸ் கைப்பற்றி உள்ளது.

திருச்செந்தூர், சென்னை, மும்பை உள்ளிட்ட இடங்களில் ஷுட்டிங் நடத்தப்பட்ட இந்த படத்தில் சிம்பு, முத்து என்ற கேரக்டரில் நடித்துள்ளார். ஹீரோயின் சித்தி இத்னானி, பாவை என்ற கேரக்டரில் நடித்துள்ளார். இந்த படத்தின் போஸ்ட், டீசர், பாடல்கள் என அனைத்தும் ரசிகர்களை பெரிதும் கவர்ந்துள்ளது.

வெந்து தணிந்தது காடு படத்தின் டிஜிட்டல் வெளியீட்டு உரிமத்தை முதலில் ஆஹா தமிழ் பெற்றிருப்பதாக சொல்லப்பட்ட நிலையில் பிறகு, அமேசான் பிரைம் வீடியோ வாங்கி உள்ளதாக சொல்லப்பட்டது. சமீபத்தில் வெந்து தணிந்தது காடு படத்தின் டப்பிங் பணிகள் முடிந்ததாக அப்டேட் வெளியிடப்பட்டது.இதனால் படத்தின் ரிலீசிற்காக ரசிகர்கள் காத்துக் கொண்டிருக்கிறார்கள்.

'வெந்து தணிந்தது காடு' படத்தில் ரஜினியா?..இது புது உருட்டா இருக்கே!

சிம்புவை கிராமம், நகரம் என இரு வேறு கெட்டப்களில் பார்க்க ரசிகர்கள் காத்துக் கொண்டிருக்கிறார்கள். இந்நிலையில் படம் பற்றிய புதிய அசத்தல் அப்டேட் ஒன்றை படக்குழு வெளியிட்டுள்ளது. வெந்து தணிந்தது காடு படத்தின் ஆடியோ மற்றும் டிரைலர் வெளியீட்டு விழா செப்டம்பர் 2ம் தேதி மிக பிரம்மாண்டமாக நடத்தப்பட உள்ளது.

பல்லாவரத்தில் உள்ள வேல்ஸ் பல்கலைக்கழகத்தில் மாலை 5 மணிக்கு இந்த விழா நடைபெற உள்ளதாக அறிவிக்கப்பட்டுள்ளது. அதுவும் இசைப்புயல் ஏ.ஆர்.ரஹ்மானின் லைவ் இசைக் கச்சேரியுடன் மிக பிரம்மாண்டமாக இந்த விழாவை நடத்த ஏற்பாடுகள் நடந்து வருகிறது. இந்த அறிவிப்பை படக்குழு இன்று புதிய வீடியோவுடன் வெளியிட்டுள்ளது.