சிம்புவுடன் இணையும் சுதா கொங்கரா?: KGF தயாரிப்பு நிறுவனத்தின் மெகா பட்ஜெட்டில் தரமான சம்பவம்!

தேசிய விருது வென்ற சூரரைப் போற்று

மாதவன், ரித்திகா சிங் ஆகியோர் நடிப்பில் வெளியான 'இறுதிச் சுற்று' படம் மூலம் கவனம் ஈர்த்தவர் இயக்குநர் சுதா கொங்காரா. ஸ்போர்ஸ் ஜானரில் உருவாகியிருந்த இந்தப் படம் ரசிகர்களிடம் நல்ல வரவேற்பைப் பெற்றது. இதனைத் தொடர்ந்து சூர்யாவுடன் கூட்டணி வைத்தார் சுதா கொங்காரா. டெக்கான் ஏர்லைன்ஸ் நிறுவனர் கோபிநாத்தின் பயோபிக்காக உருவான இந்தப் படம், நேரடியாக அமேசான் ஓடிடியில் வெளியானது. யாருமே எதிர்பார்க்காத வகையில் இமாலய வெற்றியடைந்த 'சூரரைப் போற்று', 5 தேசிய விருதுகளையும் வென்று பிரமிக்க வைத்தது.

மெஹா கூட்டணியில் சுதா கொங்கரா

சூரரைப் போற்று படத்திற்கு கிடைத்த சிறப்பான வரவேற்பால் தற்போது இந்தியிலும் ரீமேக் ஆகி வருகிறது. அக்சய் குமார் நடிப்பில் இந்தியிலும் சுதா இயக்கும் 'சூரரைப் போற்று', விரைவில் வெளியாகும் என எதிர்பார்க்கப்படுகிறது. இதனைத் தொடர்ந்து 'கேஜிஎஃப்' படத்தை தயாரித்த ஹோம்பலே நிறுவனத்துடன் இணைகிறார் சுதா கொங்கரா. இந்தப் படம் குறித்து கடந்த ஏப்ரல் மாதம் அறிவிப்பு வெளியானது. மேலும் உண்மைச் சம்பவத்தை பின்னணியாக வைத்து இந்தப் படம் உருவாகவுள்ளதாகவும் படக்குழு அறிவித்திருந்தது.

ஹீரோவாகும் சிலம்பரசன்

இன்னும் டைட்டில் கன்ஃபார்ம் ஆகாத இந்தப் படத்தில், கீர்த்தி சுரேஷ் நடிக்கலாம் என முதலில் தகவல் வெளியானது. நாயகிக்கு முக்கியத்துவம் கொடுக்கும் கதையாக இந்தப் படம் இருக்கும் எனவும் கூறப்பட்டது. ஆனால், தற்போது இது நாயகிக்கு முக்கியத்துவம் உள்ள படம் இல்லையென்றும், இதில் சிம்பு தான் ஹீரோவாக நடிக்க உள்ளதாகவும் தகவல் வெளியாகியுள்ளது. அதேபோல், சிம்புவுக்கு ஜோடியாக வேண்டுமானால் கீர்த்தி சுரேஷ் நடிக்கலாம் எனவும் சொல்லப்படுகிறது.

பிரம்மாண்டமான பட்ஜெட்டில்

சிம்புவின் நடிப்பில் மாநாடு, வெந்து தணிந்தது காடு என இரண்டு படங்களுமே சூப்பர் ஹிட் அடித்துள்ளதால், சுதா கொங்கரா இயக்கும் படத்தை பிரம்மாண்டமாக தயாரிக்க ஹோம்பலே ஃபிலிம்ஸ் முடிவு செய்துள்ளதாம். ஏற்கனவே கேஜிஎஃப் படம் மூலம் இந்தியத் திரையுலகையே திரும்பி பார்க்க வைத்த ஹோம்பலே ஃபிலிம்ஸ், இப்போது பிரசாந்த் நீல் இயக்கத்தில் பிரபாஸ் நடிக்கும் சலார் படத்தை தயாரித்து வருகிறது. அதேபோல், சில தினங்களுக்கு முன்னர் கன்னடத்தில் வெளியாகி மிகப் பெரிய வெற்றிப் பெற்றுள்ள 'கந்தாரா' படத்தையும் தயாரித்துள்ளது. முன்னதாக கந்தாரா படத்தின் வெற்றியை பாராட்டி, நடிகர் சிம்பு படக்குழுவினருக்கு கேக் அனுப்பியிருந்தது குறிப்பிடத்தக்கது. இந்நிலையில், சுதா கொங்கரா இயக்கத்தில் சிம்பு நடிக்கவுள்ளது எதிர்பார்ப்பை ஏற்படுத்தியுள்ளது.