Click it and Unblock the Notifications
சிம்பிளாக நடந்து முடிந்த எஸ்கே 23 பூஜை.. ஏ.ஆர்.முருகதாஸ் சிவகார்த்திகேயனை வைத்து சம்பவம் செய்வாரா?
சென்னை: நடிகர் சிவகார்த்திகேயன் நடிப்பில் கடைசியாக அயலான் திரைப்படம் வெளியானது. தற்போது தனது 21ஆவது படத்தில் நடித்துவருகிறார். அடுத்ததாக தனது 23ஆவது படத்தில் ஏ.ஆர்.முருகதாஸ் இயக்கத்தில் நடிக்கவிருக்கிறார். அதற்கான அதிகாரப்பூர்வ அறிவிப்பு கடந்த வருடம் வெளியான சூழலில் இன்று காதலர் தினத்தையொட்டி படத்தின் பூஜை போடப்பட்டது. இதில் அனிருத், சிவகார்த்திகேயன், ஏ.ஆர்.முருகதாஸ் உள்ளிட்டோர் கலந்துகொண்டனர்.
அஜித் நடிப்பில் கடந்த 2001ஆம் ஆண்டு வெளியான படம் தீனா. எஸ்.ஜே.சூர்யவிடம் உதவி இயக்குநராக இருந்த ஏ.ஆர்.முருகதாஸ் இந்தப் படத்தின் மூலம் இயக்குநராக அறிமுகமானார். இந்தப் படத்தில் அஜித்துடன் சுரேஷ் கோபி, லைலா உள்ளிட்டோர் நடித்திருந்தனர். யுவன் ஷங்கர் ராஜா இசையமைத்திருந்தார். இந்தப் படம்தான் அஜித்தை ஆக்ஷன் படங்களில் அடுத்தக்கட்டத்திற்கு நகர்த்தி சென்றது. இதுவரை அஜித்தின் படங்களில் வந்த அவரது அறிமுக காட்சிகளில் தீனா படத்திற்கு எப்போதும் தனி இடம் உண்டு.
டாப் இயக்குநர்: முதல் படம் மெகா ஹிட்டான பிறகு விஜயகாந்த்தை வைத்து ரமணா படத்தை இயக்கினார். முதல் படத்தில் கமர்ஷியலாக களமிறங்கிய முருகதாஸ் இரண்டாவது படத்தில் சமூக அக்கறையுடன் களமிறங்கினார். லஞ்சத்திற்கு எதிராக போராடும் ஒரு பேராசிரியரை வைத்து கோலிவுட்டை கலக்கினார் முருகதாஸ். அந்தப் படம் மிகப்பெரிய ஹிட்டடித்தது. குறிப்பாக அதுவரை ஆக்ஷன் ஹீரோவாகவே வலம் வந்த விஜயகாந்த் அந்தப் படத்தில் பக்குவமாக அடக்கி வாசித்திருப்பார்.
முருகதாஸின் கஜினி: முதல் இரண்டு படங்களுமே மெகா ப்ளாக் பஸ்டர் ஆனதால் முன்னணி இயக்குநராக மாறிவிட்டார் முருகதாஸ். தொடர்ந்து சூர்யாவை வைத்து அவர் இயக்கிய கஜினி படமும் மெகா ஹிட்டாக அந்தப் படம் ஹிந்தியில் ரீமேக்கானது. அமீர்கான் நடித்திருந்த கஜினி ஹிந்தி ரீமேக்கையும் முருகதாஸே இயக்கினார். பாலிவுட்டிலும் கஜினி ஹிட்டடிக்க இந்திய அளவில் கவனிக்கப்படும் இயக்குநர்களில் ஒருவராக மாறிவிட்டார் முருகதாஸ். தொடர்ந்து அவர் தமிழில் இயக்கிய ஏழாம் அறிவு படமும் ஹிட்டானது.
துப்பாக்கி, கத்தி: விஜய் தொடர் தோல்விகளில் துவண்டிருந்தபோது அவருக்கு பக்கா கமர்ஷியல் ஹிட் கொடுத்தது ஏ.ஆர்.முருகதாஸ் இயக்கத்தில் வெளியான துப்பாக்கி. அதுவரை விஜய்யை யாரும் அவ்வளவு ஸ்டைலிஷாக பார்த்ததில்லை என்ற பெயரை துப்பாக்கி பெற்றுக்கொடுத்தது. அதேபோல் விஜய்யுடன் இரண்டாவது முறை இணைந்த கத்தி படமும் மெகா ஹிட்டாக; மூன்றாவதாக இணைந்த சர்கார் அடிவாங்கியது. தொடர்ந்து முருகதாஸ் இயக்கும் படங்களும் கலவையான விமர்சனங்களையே பெற்றன. அதில் ரஜினியின் தர்பாரும் அடக்கம்.
அடுத்த படம்: ஏ.ஆர்.முருகதாஸ் அடுத்ததாக சிவகார்த்திகேயனை வைத்து ஒரு படத்தை இயக்கவிருக்கிறார். அதற்கான அதிகாரப்பூர்வ அறிவிப்பு கடந்த வருடம் வெளியானது. கடந்த சில வருடங்களாகவே முருகதாஸ் ஒரு ஹிட் கொடுக்க முடியாமல் திணறிவருகிறார். முக்கியமாக ஒருகாலத்தில் எப்படிப்பட்ட இயக்குநராக இருந்தவர் இப்போது இப்படி தடுமாறிக்கொண்டிருக்கிறாரே என்று அவர் மீது ரசிகர்கள் பரிதாப பார்வையையும் வீச ஆரம்பித்திருக்கின்றனர் என்பது குறிப்பிடத்தக்கது.
பூஜை: இந்நிலையில் சிவகார்த்திகேயனை வைத்து முருகதாஸ் இயக்கும் படத்துக்கு தற்காலிகமாக எஸ்கே 23 என்று பெயர் வைக்கப்பட்டுள்ளது. இந்தப் படத்தின் பூஜை இன்று சென்னையில் நடைபெற்றது. இந்தப் பூஜையில் ஏ.ஆர்.முருகதாஸ், சிவகார்த்திகேயன், அனிருத் உள்ளிட்டோர் கலந்துகொண்டனர். ஹீரோயினாக ருக்மினி வசந்த் நடிக்கவிருக்கிறார். அதற்கான அறிவிப்பையும் அவர் தனது ட்விட்டர் பக்கத்தில் வெளியிட்டு உறுதி செய்தார்.
சிவகார்த்திகேயன் கடைசியாக நடித்த மாவீரன், அயலான் ஆகிய இரண்டு படங்களுமே சூப்பர் ஹிட்டடித்திருக்கின்றன. தற்போது 21ஆவது படத்தில் நடித்துவருகிறார் அவர். கண்டிப்பாக இந்தப் படமும் ஹிட் அடிக்கும் என்ற நம்பிக்கையில் இருக்கும் எஸ்கே ரசிகர்கள்; முருகதாஸுடன் இணைந்திருக்கும் படமும் அவரது கரியரில் முக்கியத்துவம் வாய்ந்ததாக இருக்கும் என்று கமெண்ட்ஸை பறக்கவிட்டுக்கொண்டிருக்கின்றனர்.
Continue with Google